ဂျာမနီအနေနဲ့ ကာကွယ်ရေးနဲ့ အခြေခံအဆောက်အအုံဆိုင်ရာ အသုံးစရိတ်ကို အများအပြား တိုးမြှင့်ခွင့်ပြုဖို့ လွှတ်တော်မှာ မဲခွဲဆုံးဖြတ်လိုက်ပါတယ်။ မတ်လ ၁၈ ရက်က ပြုလုပ်တဲ့ ပါလီမန်အစည်းအဝေးမှာ လွှတ်တော် အမတ် ၃ ပုံ ၂ ပုံက ထောက်ခံအတည်ပြုခဲ့တာပါ။ လက်ရှိအတည်ပြုလိုက်တဲ့ အသုံးစရိတ်မြှင့်တင်တဲ့ ဥပဒေမှာ ကာကွယ်ရေးနဲ့ အခြေခံအဆောက်အအုံကဏ္ဍအတွက် ယူရို ဘီလီယံ ၅၀၀ အထိ သုံးစွဲခွင့် ပြုလိုက်ပါတယ်။
ယူရိုဘီလီယံ ၅၀၀ နဲ့ သုံးစွဲမယ့်ထဲမှာ ကာကွယ်ရေးတိုးမြှင့်ဖို့၊ လမ်း၊ တံတားလို အခြေခံအဆောက်အအုံတွေ အဆင့်မြှင့်တင်ဖို့နဲ့ ရာသီဥတုပြောင်းလဲမှုဆိုင်ရာ အစီအမံတွေအတွက်လည်း ပါဝင်ပါတယ်။ သမ္မတ ဒေါ်နယ် ထရမ့်လက်ထက် အမေရိကန်ဟာ နေတိုးအဖွဲ့နဲ့ ဥရောပကို အကာအကွယ်ပေးဖို့ မသေချာတော့တဲ့အခြေအနေ ဖြစ်လာတဲ့အတွက် ဥရောပနိုင်ငံတွေဟာ ကာကွယ်ရေးအသုံးစရိတ် မြှင့်တင်လာကြတာဖြစ်ပြီး ဂျာမနီကလည်း အခုလို သမိုင်းဝင် ကာကွယ်ရေးအသုံးစရိတ် မြှင့်တင်မှုကို ပြုလုပ်လာတာပါ။ မကြာခင်မှာ ဂျာမနီအဓိပတိ ဖြစ်လာမယ့် ဖရက်ဒရစ်မာ့ဇ် (Friedrich Merz)ဟာ ဒီအသုံးစရိတ်တိုးမြှင့်ဖို့အတွက် အဓိက ဆောင်ရွက်ခဲ့သူဖြစ်ပြီး ဒါဟာ ဥရောပကို ကာကွယ်ရေးအတွက် ပထမဆုံး အဓိကခြေလှမ်းတစ်ခုဖြစ်တယ်လို့ သူက အောက်လွှတ်တော် မှာ ပြောကြားခဲ့ပါတယ်။
ဥရောပကော်မရှင် ဥက္ကဋ္ဌ အာဆူလာ ဗွန်ဒါလီယန်းကလည်း ဒီမဲခွဲဆုံးဖြတ်မှုကို ကြိုဆိုခဲ့ ပါတယ်။ ဂျာမနီဟာ ဒုတိယကမ္ဘာစစ်အပြီး ၁၉၄၅ ခုနှစ်ကစလို့ သမိုင်းဆိုင်ရာ အကြောင်းအချက်အလက်တွေ အပြင် ၂၀၀၉ ခုနှစ် ကမ္ဘာ့ကြွေးမြီအကျပ်အတည်းတွေကြောင့်လည်း ကာကွယ်ရေးအသုံးစရိတ်ကိစ္စကို ကာလ ရှည်ကြာ သတိထားကိုင်တွယ်ခဲ့ပါတယ်။ လက်ရှိမှာတော့ ဥရောပလုံခြုံရေး အခြေအနေတွေကြောင့် အခုလို သမိုင်းဝင် ကာကွယ်ရေး အသုံးစရိတ်တိုးမြှင့်လိုက်တာဖြစ်ပြီး ဂျာမန်ထိပ်တန်း သတင်းစာတစ်စောင်က ဒီမဲခွဲ ဆုံးဖြတ်ခဲ့တဲ့နေ့ကို နိုင်ငံအတွက် ကြီးမားတဲ့အပြောင်းအလဲနေ့လို့ ရေးသားခဲ့ပါတယ်။
