ဂျာမနီရဲ့ ကာကွယ်ရေးနဲ့ စစ်ရေးအသုံးစရိတ်ကို ကြီးကြီးမားမား တိုးမြှင့်သုံးစွဲခွင့်ပြုတဲ့ ဥပဒေကို အထက် လွှတ်တော်က မတ်လ ၂၁ ရက်မှာ ထောက်ခံအတည်ပြုလိုက်ကြောင်း Reuters သတင်းမှာ ဖော်ပြပါတယ်။ဒုတိယကမ္ဘာစစ် နောက်ပိုင်း ဂျာမနီရဲ့ ကာကွယ်ရေး အနေအထားဟာ သိသိသာသာ ပြောင်းလဲသွားပြီလို့ ဘာလင် အခြေစိုက်သတင်းတွေကလည်း ဖော်ပြကြပါတယ်။ ကာကွယ်ရေး အသုံးစရိတ်ကို ကန့်သတ်ထားတဲ့အတွက် ဂျာမနီဟာ စစ်အင်အားနဲ့ ကာကွယ်ရေးရင်းနှီးမြှုပ်နှံမှု တွေ တိုးချဲ့ဖို့ သုံးစွဲခွင့်မရှိခဲ့သလို ယူကရိန်းကို ပေးတဲ့ အကူအညီတွေမှာလည်း အကန့်အသတ်တွေ ရှိခဲ့တယ်လို့ ဆိုပါတယ်။
ဂျာမနီရဲ့ ကာကွယ်ရေး အသုံးစရိတ်ကို ခြွင်းချက်မရှိ တိုးမြှင့် သုံးစွဲခွင့်ပြုဖို့ အောက်လွှတ်တော်က စတင် အတည် ပြုပေးခဲ့ပြီး အထက်လွှတ်တော်ကပါ သဘောတူလိုက်ပြီဖြစ်တဲ့အတွက် မကြာခင် ဝန်ကြီးချုပ်ဖြစ်လာတော့မယ့် ဖရက်ဒရစ် မက်ဇ် အနေနဲ့ ဂျာမနီ ကာကွယ်ရေးနဲ့ ဥရောပ လုံခြုံရေးအတွက် စစ်အသုံးစရိတ်တွေ ဘယ်လို သုံးစွဲ မယ်ဆိုတာကိုလည်း ထုတ်ဖော်ပြောဆိုလိမ့်မယ်လို့ ယူဆရကြောင်း ဂျာမန် သတင်းတွေက ဖော်ပြကြပါတယ်။
ရာထူးကနေ နုတ်ထွက်ရတော့မယ့် ဝန်ကြီးချုပ် အိုလတ်ဖ် ရှိုး လက်ထက်က ဂျာမနီရဲ့ Taurus အဝေးပစ်ဒုံးကျည် တွေကို ယူကရိန်း ပေးဖို့ အကြိမ်ကြိမ် ငြင်းဆိုခဲ့သလို ၂၀၂၅ အတွက် အကူအညီပေးဖို့ ကတိပြုထားတဲ့ထဲက ဒေါ်လာ သန်း ၃,၀၀၀ ကျော်ကိုလည်း မပေးဘဲ ဆိုင်းငံ့ထားခဲ့တာဖြစ်ပါတယ်။အထက်လွှတ်တော်ရဲ့ ထောက်ခံ အတည်ပြုချက် ရပြီးနောက်မှာတော့ ဆိုင်းငံ့ထားတဲ့ ဒေါ်လာ သန်း ၃,၀၀၀ ကျော်ကို ယူကရိန်းကို ပေးဖို့ လွှတ်တော် ဘတ်ဂျက်ကော်မတီက အတည်ပြုပေးလိုက်ပြီဖြစ်တယ်လို့ ဘာလင် အခြေစိုက် သတင်းတွေက ဖော်ပြကြပါတယ်။
