အမေရိကန်နိုင်ငံတစ်ဝမ်းက သန်းနဲ့ချီတဲ့ အသေးစားစီးပွားရေးလုပ်ငန်းတွေကို ချေးငွေနဲ့ တခြားအကူအညီတွေ ပေးနေတဲ့ အသေးစားစီးပွားရေး စီမံခန့်ခွဲရေးဌာန(SBA)က ဝန်ထမ်း ၂၇၀၀ ကို လျှော့ချမယ်လို့ ထရမ့်အစိုးရ အဖွဲ့က မတ်လ ၂၁ ရက်မှာ ကြေညာပါတယ်။ လုပ်သားအင်အား ၆၅၀၀ ရှိတဲ့ ဒီဌာနကနေ လုပ်သား ၄၃ ရာခိုင်နှုန်းကျော်ကို လျှော့ချမှာ ဖြစ်ပါတယ်။
ထရမ့်အစိုးရအဖွဲ့ဟာ ဖက်ဒရယ် အသုံးစရိတ် လျှော့ချဖို့အတွက် အစိုးရဝန်ထမ်းတွေကို အလုပ်က ထုတ်ပယ်တာ တွေ ဆက်တိုက် ပြုလုပ်နေတာပါ။ အရင်အစိုးရအဖွဲ့ရဲ့ ကုန်ကျစရိတ်များတဲ့ မူဝါဒတွေကို ပြင်ဆင်ပြီး အစိုးရ ဌာနတွေက မလိုအပ်တဲ့ အခန်းကဏ္ဍတွေကို ဖယ်ရှားဖို့ ဆောင်ရွက်တာလို့ ထရမ့်အစိုးရရဲ့ ကြေညာချက်မှာ ဖော်ပြထားပါတယ်။ထရမ့်ဟာ ဖောင်းပွပြီး ထိရောက်မှုမရှိတဲ့ ဖက်ဒရယ်အစိုးရဌာနတွေကို ပြန်ဖွဲ့စည်းဖို့ ဘီလျံနာအီလွန်မတ်စ်ကို တာဝန်ပေးထားတာဖြစ်ပြီး အစုလိုက်အပြုံလိုက် အလုပ်ကနေထုတ်ပယ်တာတွေ လုပ်ဆောင်နေတာပါ။
လာမယ့်သီတင်းပတ်တွေအတွင်းမှာလည်း ထောင်နဲ့ချီတဲ့ အစိုးရဝန်ထမ်းတွေ အစုလိုက်အပြုံလိုက် အလုပ်ထုတ် ခံရဖွယ်ရှိတယ်လို့ နီးစပ်တဲ့ သတင်းရင်းမြစ်နှစ်ခုက ပြောထားကြောင်း ရိုက်တာက ဖော်ပြပါတယ်။ထရမ့်အစိုးရရဲ့ အခုလို အလုပ်ဖြုတ်တာတွေအပေါ် ဝါရှင်တန်ဒီစီနဲ့ ဒီမိုကရက်တွေ ဦးဆောင်တဲ့ ပြည်နယ် ၁၉ ခုက တရားစွဲဆိုတာတွေ ပြုလုပ်ထားပြီး တရားရုံးကလည်း ဝန်ထမ်းအချို့ကို အလုပ်နေရာတွေ ပြန်ခန့်ထားဖို့ အမိန့်ပေးထားပါတယ်။
