ဟူသီသူပုန်အဖွဲ့ကို တိုက်ခိုက်မယ့် အစီအစဉ်တွေဟာ ထရမ့်အစိုးရအဖွဲ့ အကြီးတန်းအရာရှိတစ်ယောက်ရဲ့ ပေါ့ဆမှုကြောင့် ပေါက်ကြားခဲ့တယ်လို့ နိုင်ငံတကာသတင်းတွေမှာ ဖော်ပြပါတယ်။ ဒီစစ်ရေးအစီအစဉ်တွေ အကြောင်းကို Signal အက်ပလီကေးရှင်းထဲက ဂရုချက်(Group Chat) တစ်ခုမှာ အမေရိကန် အကြီးတန်း အရာရှိတွေ ဆွေးနွေးနေတာဖြစ်ပြီး ဒီဂရုထဲမှာ သတင်းထောက်တစ်ယောက်ကို မတော်တဆ ထည့်မိသွားခဲ့တဲ့ ဖြစ်စဉ် ဖြစ်ခဲ့တာလို့ အိမ်ဖြူတော်က အတည်ပြုပါတယ်။
အမေရိကန်အမျိုးသားလုံခြုံရေးအကြံပေး မိုက်ကယ်ဝေါ့ဇ်အကောင့်က The Atlantic သတင်းဌာနရဲ့ အယ်ဒီတာ ချုပ် ဂျက်ဖရေး ဂိုးဘတ်ဂျ်(Jeffrey Goldberg)ကို Signal ဂရုချက်ထဲ ထည့်ခဲ့တာဖြစ်ပြီး ဒီဖြစ်စဉ်ကို ဂိုးဘတ်ဂျ် ကလည်း အတည်ပြုခဲ့ပါတယ်။ဒီဂရုချက်ထဲမှာ စီစဉ်ထားတဲ့ စစ်ရေးတိုက်ခိုက်မှု အသေးစိတ်အချက်အလက်တွေကို အမေရိကန်ကာကွယ်ရေး ဝန်ကြီး ပိ(တ်)ဟတ်ဆက်တ်(Pete Hegseth)က မျှဝေခဲ့တယ်လို့ စွပ်စွဲခံထားရပေမယ့် ပိ(တ်)ကတော့ စစ်ရေး အစီအစဉ်တွေကို ဘယ်သူကမှ စာမပို့ခဲ့ဘူးလို့ ငြင်းဆိုခဲ့ပါတယ်။The Atlantic သတင်းကတော့ ပိ(တ်)ဟတ်ဆက်တ်ဟာ ဂရုချက်ထဲမှာ ဟူသီသူပုန်တွေကို တိုက်ခိုက်ဖို့နဲ့ ပတ်သက်လို့ အမေရိကန်က ဖြန့်ကြက်မယ့် လက်နက်တွေ၊ ထပ်တိုက်ခိုက်မယ့် ပစ်မှတ်တွေအကြောင်းပါတဲ့ စစ်ရေးအစီအစဉ်အသေးစိတ်ကို ပေးပို့ခဲ့တယ်လို့ ရေးသားပါတယ်။
ထရမ့်အစိုးရ အမျိုးသားလုံခြုံရေးအဖွဲ့ရဲ့ အခုလို ဂရုချက်ပေါက်ကြားမှုဟာ ကြီးမားတဲ့ ကျရှုံးမှုတစ်ခုဖြစ်တယ်လို့ ဝေဖန်မှုတွေ ရှိပါတယ်။ အမေရိကန်သမ္မတ ဒေါ်နယ်ထရမ့်ကတော့ ဒီဂရုချက်နဲ့ ပတ်သက်လို့ သူဘာမှမသိဘူးလို့ ပြောပါတယ်။လက်ရှိမှာ အထက်လွှတ်တော် ဒီမိုကရက်ခေါင်းဆောင် ချက်ရှူးမား (Chuck Schumer)က ဒီဂရုချက် ပေါက်ကြား မှုနဲ့ ပတ်သက်ပြီး စုံစမ်းစစ်ဆေးဖို့အတွက် ဒီမိုကရက်တွေအကြား တောင်းဆိုမှုတွေကို ဦးဆောင်နေပါတယ်။ဒီလိုကြီးလေးတဲ့အမှားနဲ့ သတင်းပေါက်ကြားမှုအတွက် တာဝန်ရှိသူ တစ်ယောက်ယောက်ကို အလုပ်က ထုတ်ပယ် ဖို့ လိုတယ်လို့ ကာကွယ်ရေးဝန်ကြီးနဲ့ စီအိုင်အေ ညွှန်ကြားရေးမှူးဟောင်း လီယွန်ပန်နက်တာက CNN ကို ပြောပါတယ်။
