ကျူးဘား၊ ဟေတီ၊ နီကာရာဂွာနဲ့ ဗင်နီဇွဲလားနိုင်ငံတွေက ရွှေ့ပြောင်းနေထိုင်သူ ၅ သိန်း ၃ သောင်းကျော်ရဲ့ အမေရိကန်မှာ တရားဝင်နေထိုင်ခွင့်ကို ထရမ့်အစိုးရအဖွဲ့က ပယ်ဖျက်လိုက်တယ်လို့ ရိုက်တာသတင်းမှာ ဖော်ပြပါ တယ်။ ဒီအတွက် ဒီလူဦးရေ ၅ သိန်းကျော်ဟာ အမေရိကန်မှာ တရားဝင်ဆက်နေထိုင်နိုင်ဖို့ အစီအစဉ် တစ်ခုခုကို ရှာဖွေရမှာဖြစ်ပြီး တရားဝင်ဆက်နေထိုင်ခွင့် မရဘူးဆိုရင် လာမယ့် ဧပြီလ ၂၄ ရက် မတိုင်မီ နိုင်ငံ အတွင်းကနေ ထွက်ခွာဖို့ ပြည်ထောင်စုအစိုးရက သတိပေးထားပါတယ်။
ပြီးခဲ့တဲ့ ဂျိုးဘိုင်ဒန်အစိုးရ လက်ထက် ၂၀၂၂ ခုနှစ်မှာ လူသားချင်းစာနာထောက်ထားမှုအရ CHNV ဆိုတဲ့ အစီအစဉ် တစ်ခုကို စတင်ခဲ့ပြီး ဒီအစီအစဉ်အရ ကျူးဘား၊ ဟေတီ၊ နီကာရာဂွာနဲ့ ဗင်နီဇွဲလားနိုင်ငံတွေက ရွှေ့ပြောင်းနေထိုင် သူတွေကို အမေရိကန်မှာ တရားဝင် နှစ်နှစ်ကြာ ယာယီနေထိုင်ခွင့်ပြုတာပါ။ဒီအစီအစဉ်အရ ဝင်ရောက်လာသူတွေဟာ အမေရိကန်မှာ အလုပ်လုပ်ကိုင်ခွင့်ရရှိပြီး နေထိုင်ခွင့် ဆက်ရဖို့အတွက် ခိုလှုံခွင့်တောင်းခံတာ၊ အလုပ်အကိုင်ဆိုင်ရာ ဗီဇာတစ်ခုခုလျှောက်ထားတာတွေ ဆောင်ရွက်နိုင်တာ ဖြစ်ပါတယ်။လက်ရှိမှာတော့ ထရမ့်အစိုးရက ဒီအစီအစဉ်ကို ရပ်ဆိုင်းပြီး လျှောက်လွှာအသစ်တွေ လက်မခံတော့သလို ပြည်တွင်းမှာ ရောက်နေပြီးသားဖြစ်တဲ့ ရွှေ့ပြောင်းနေထိုင်သူတွေကိုလည်း နေရပ်ပြန်ပို့ဖို့ စီစဉ်နေတာပါ။
CHNV အစီအစဉ်နဲ့ ရောက်ရှိနေတဲ့ ရွှေ့ပြောင်းတွေအနေနဲ့ ခိုလှုံခွင့်ရရှိဖို့၊ အလုပ်အကိုင်ဆိုင်ရာ ဗီဇာတစ်ခုခု ရရှိဖို့ တွေကို အမြန်ဆောင်ရွက်ရမှာဖြစ်ပြီး ဒါတွေကလည်း မသေချာတဲ့အတွက် အမေရိကန်ကနေ ပြည်နှင်ဒဏ် ခံရဖွယ် ရှိနေတယ်လို့ လေ့လာသူတွေက ပြောပါတယ်။အမေရိကန်တောင်ပိုင်းနယ်စပ်ကနေ တရားမဝင် နယ်စပ်ဖြတ်ကျော် ဝင်ရောက်တာတွေကို လျှော့ချနိုင်ဖို့အတွက် ဘိုင်ဒန်အစိုးရက ဒီအစီအစဉ်ကို စတင်ခဲ့တာဖြစ်ပြီး လူဝင်မှုကြီးကြပ်ရေးကန့်သတ်မှုတွေ ဆက်တိုက်လုပ်နေတဲ့ ထရမ့်အစိုးရကတော့ ဒီအစီအစဉ်ကို ပယ်ဖျက်လိုက်တာပါ။ ဒေါ်နယ်ထရမ့်အစိုးရဟာ ရုရှားနဲ့ စစ်ပွဲဖြစ်ပွားပြီး နောက် အမေရိကန်ကို ထွက်ပြေးခိုလှုံနေတဲ့ ယူကရိန်းနိုင်ငံသား ၂၄၀,၀၀၀ ခန့်ရဲ့ ယာယီ တရားဝင် နေထိုင်ခွင့်ကို လည်း ပယ်ဖျက်ဖို့ စဉ်းစားနေပါတယ်။
