ပင်လယ်နက်၌ ဘေးကင်းရေး ယူကရိန်းနှင့်ရုရှား သဘောတူ

ပင်လယ်နက်အတွင်း ဘေးကင်းလုံခြုံစွာ ရေကြောင်းသွားလာရေးနဲ့ စွမ်းအင်ဆိုင်ရာ အခြေခံအဆောက်အအုံတွေ ကို နှစ်နိုင်ငံ တိုက်ခိုက်နေတာကနေ ရပ်တန့်ရေးအတွက် ယူကရိန်းနဲ့ရုရှား နှစ်နိုင်ငံဟာ မတ်လ ၂၅ ရက်က သဘောတူညီမှု ရရှိခဲ့တယ်လို့ Reuters သတင်းမှာ ဖော်ပြပါရှိပါတယ်။ တားမြစ်ချက်တွေ အကောင်အထည်ဖော်ဖို့ အတွက် နှစ်နိုင်ငံ သီးခြားသဘောတူညီချက်တွေ ရရှိခဲ့တယ်လို့ ဆိုပါတယ်။

အဲ့ဒီ သဘောတူညီချက်တွေကို လျင်မြန်စွာ အကောင်အထည် ဖော်ဆောင်နိုင်ရင် ကျယ်ပြန့်တဲ့ အပစ်အခတ်ရပ်စဲရေး ပန်းတိုင်ဆီကို ရောက်ရှိသွား မယ့် လမ်းစကို မြင်တွေ့ရတယ်လို့ ကျွမ်းကျင်သူတွေက ခန့်မှန်း သုံးသပ်ကြပါတယ်။ ဒါဟာ အပစ်ရပ်စဲရေးအတွက် တိုးတက်မှုကို ကိုယ်စားပြုပြီး ရုရှားကျူးကျော်နေတဲ့ သုံးနှစ်ကြာ စစ်ပွဲကို အဆုံး သတ်စေမယ့် ငြိမ်းချမ်းရေး ဆွေးနွေးပွဲတွေဆီကို ခြေလှမ်း လှမ်းလာနေတဲ့ အရိပ်အယောင်တွေ မြင်တွေ့နေရ တယ်လို့ ယူကရိန်း သမ္မတက ပြောပါတယ်။

တစ်ဖက်မှာလည်း မော်စကိုနဲ့ သဘောတူညီချက်အရ ဝါရှင်တန်က ရုရှားနိုင်ငံကနေ တင်ပို့နေတဲ့ စိုက်ပျိုးရေး နဲ့ ဓာတ်မြေသြဇာအတွက် စျေးကွက်တွေကို ပြန်လည်ရရှိအောင် ကူညီပေးမယ်လို့ ကတိပြုခဲ့ပါတယ်။ ဒါ့အပြင် ရုရှားအပေါ် ပိတ်ဆို့အရေးယူမှုအချို့ကို ရုတ်သိမ်းဖို့လည်း ဆောင်ရွက် ပေးသွားမယ်လို့ ဆိုပါတယ်။အမေရိကန်သမ္မတဒေါ်နယ်ထရမ့်ရဲ့ သမ္မတဇယ်လန်စကီးနဲ့ သမ္မတပူတင်တို့ကို ပြီးခဲ့တဲ့သီတင်းပတ်က သီးခြား ဖုန်းခေါ်ဆိုဆွေးနွေးအပြီးမှာ အခုလို သဘောတူညီချက်တွေ ထွက်ပေါ်လာတာဖြစ်ပါတယ်။