တာလီဘန်ခေါင်းဆောင်များကို ဆုငွေထုတ်ထားမှု ထရမ့် ရုပ်သိမ်း

အာဖဂန်နစ္စတန်က ဟာကွာနီ(Haqqani) စစ်သွေးကြွကွန်ရက်ရဲ့ ခေါင်းဆောင်ဖြစ်သလို တာလီဘန်အစိုးရရဲ့ ပြည်ထဲရေးဝန်ကြီးလည်းဖြစ်တဲ့ စီယာဂျူဒင် ဟာကွာနီ(Sirajuddin Haqqani)အပေါ် အမေရိကန်က ဆုငွေ ထုတ်ထားမှုကို ဖယ်ရှားလိုက်ပြီ ဖြစ်ပါတယ်။ ဟာကွာနီစစ်သွေးကြွကွန်ရက်ဟာ အမေရိကန်ဦးဆောင်တဲ့ အာဖဂန်စစ်ပွဲ ကာလအတွင်းက အမေရိကန်၊ အိန္ဒိယသံရုံးနဲ့ နေတိုးတပ်ဖွဲ့တွေကို တိုက်ခိုက်တာ အပါအဝင် အထင်ရှားဆုံးနဲ့ အဆိုးရွားဆုံးတိုက်ခိုက်မှုတွေကို လုပ်ဆောင်ခဲ့တဲ့ အဖွဲ့ဖြစ်ပါတယ်။

ထရမ့်အစိုးရရဲ့ ပထမသက်တမ်းအတွင်းက အမေရိကန်နဲ့ တာလီဘန်အကြား သဘောတူညီမှု ရရှိခဲ့ပြီးနောက် ၂၀၂၁ ခုနှစ်မှာ အမေရိကန်တပ်တွေ အာဖဂန်နစ္စတန်က ဆုတ်ခွာခဲ့ပါတယ်။ အဲဒီနောက်ပိုင်းမှာ အာဖဂန်နစ္စတန် ကို တာလီဘန်အစိုးရက အုပ်ချုပ်နေတာဖြစ်ပြီး ဟာကွာနီကွန်ရက်က တာလီဘန်အစိုးရရဲ့ အဓိက အစိတ်အပိုင်း တစ်ခုဖြစ်ပါတယ်။ လက်ရှိမှာတော့ အဖွဲ့ခေါင်းဆောင် စီယာဂျူဒင် ဟာကွာနီအပါအဝင် ဒီကွန်ရက်ရဲ့ တခြား ခေါင်းဆောင်တွေဖြစ်တဲ့ စီယာဂျူဒင်ရဲ့ အကိုဖြစ်သူနဲ့ ယောက်ဖဖြစ်သူတွေကိုပါ ဆုငွေထုတ်ထားတာ မရှိတော့ ဘူးလို့ အမေရိကန်နိုင်ငံခြားရေးဌာန ပြောရေးဆိုခွင့်ရှိသူက BBC ကို အတည်ပြုပါတယ်။

စီယာဂျူဒင် ဟာကွာနီကို အရင်က ဆုငွေ အမေရိကန်ဒေါ်လာ ၁၀ သန်းအထိ ထုတ်ထားတာဖြစ်ပြီး လက်ရှိမှာ တော့ FBI ဝက်ဘ်ဆိုဒ်မှာ ဒီဆုကြေးငွေကို ဖယ်ရှားလိုက်ပါပြီ။ တာလီဘန် ပြည်ထဲရေးဝန်ကြီးဌာန ပြောရေး ဆိုခွင့်ရှိသူက ဒီလိုဆုငွေရုပ်သိမ်းတာဟာ တာလီဘန်အစိုးရရဲ့ သံတမန်ရေးအရ ဆက်လက်ကြိုးပမ်းမှုတွေ ကြောင့်လို့ ပြောပါတယ်။၂၀၂၂ ခုနှစ် ဒီဇင်ဘာလက အာဖဂန်နစ္စတန်ကို ကမ္ဘာလှည့်ခရီးသည်အဖြစ် လာရောက်စဉ် တာလီဘန်တွေရဲ့ ဖမ်းဆီးတာကိုခံထားရတဲ့ အမေရိကန်နိုင်ငံသားတစ်ယောက် ပြီးခဲ့တဲ့ရက်ပိုင်းက ပြန်လွတ်လာပြီးနောက် ဒီဆုငွေ ရုပ်သိမ်းမှု ပေါ်ပေါက်လာတာဖြစ်ပါတယ်။