ကြက်ဥဈေးနှုန်းမြင့်တက်မှုကို ဖြေရှင်းဖို့အတွက် အမေရိကန်အစိုးရက တောင်ကိုရီးယားနဲ့ တူကီယဲနိုင်ငံတွေ ကနေ ကြက်ဥအလုံးရေ သန်းနဲ့ချီ တင်သွင်းဖို့အတွက် စီစဉ်နေပါတယ်။ ရေတိုဖြေရှင်းမှုအနေနဲ့ ကြက်ဥအလုံးရေ သန်းရာနဲ့ချီတင်သွင်းဖို့ စီစဉ်နေတယ်လို့ အမေရိကန် စိုက်ပျိုးရေးဝန်ကြီး ဘရွတ် ရိုးလင်း (Brooke Rollins) က အိမ်ဖြူတော်မှာ သတင်းထောက်တွေကို ပြောပါတယ်။
ပိုလန်နဲ့ လစ်သူယေးနီးယား ကြက်မွေးမြူရေးအသင်းတွေဆီကိုလည်း ကြက်ဥ ဝယ်ယူတင်သွင်းဖို့အတွက် သက်ဆိုင်ရာ အမေရိကန် သံရုံးတွေကတစ်ဆင့် မေးမြန်းစုံစမ်းလာတာတွေ ရှိတယ်လို့ သက်ဆိုင်ရာ အသင်း အဖွဲ့တွေက ပြောပါတယ်။ဘရွတ် ရိုးလင်းကတော့ လာမယ့် လအနည်းငယ်အတွင်းမှာ အမေရိကန်ရဲ့ ဥစားကြက်မွေးမြူရေး လုပ်ငန်းတွေ အခြေအနေပြန်ကောင်းလာဖို့ မျှော်မှန်းထားတယ်လို့ ပြောပါတယ်။ အမေရိကန်ကြက်မွေးမြူရေးခြံတွေမှာ ပြီးခဲ့တဲ့ ၂၀၂၂ ခုနှစ်ကစလို့ ကြက်ငှက်တုပ်ကွေးရောဂါ အကြီးအကျယ် ပျံ့နှံ့ခဲ့ပြီး ကြက်ကောင်ရေ ၁၅၆ သန်းကျော် သေဆုံးခဲ့သလို နောက်ပိုင်းနှစ်တွေမှာ ကြက်ဥဈေးတွေလည်း တဟုန်ထိုး မြင့်တက်ခဲ့ပါတယ်။
အဲဒီနောက်မှာ အမေရိကန် အစိုးရက ကြက်ငှက်တုပ်ကွေးရောဂါ ကူးစက်ပျံ့နှံ့မှုကို တိုက်ဖျက်ဖို့ အမေရိကန်ဒေါ်လာ ၁ ဘီလီယံ ထောက်ပံ့မယ်လို့ ကြေညာခဲ့ပြီး မွေးမြူသူတွေက ရောဂါကူးစက်ခံထားရတဲ့ တိရစ္ဆာန်တွေကို သုတ်သင်ခဲ့ရ ပါတယ်။အမေရိကန်သမ္မတ ဒေါ်နယ်ထရမ့်ကတော့ မဲဆွယ်စည်းရုံးစဉ်ကာလတုန်းက စားသောက်ကုန်ဈေးနှုန်းတွေ ကျဆင်းအောင်လုပ်မယ်လို့ ကတိပေးထားပေမယ့် ပြီးခဲ့တဲ့နှစ်က ကြက်ဥဈေးနှုန်းဟာ ၆၅ ရာခိုင်နှုန်းကျော် မြင့်တက်ခဲ့ပြီး အခု ၂၀၂၅ ခုနှစ်အတွင်းမှာလည်း ၄၁ ရာခိုင်နှုန်းအထိ ဆက်မြင့်တက်နိုင်တယ်လို့ သိရပါတယ်။
