ပါလက်စတိုင်းဒုက္ခသည်ကူညီရေး ရန်ပုံငွေကိစ္စ အီးယူသုံးသပ်မည်

အစ္စရေးတောင်ပိုင်းကို ဟားမာ့စ်တွေရဲ့ အောက်တိုဘာ ၇ တိုက်ခိုက်မှုမှာ ကုလသမဂ္ဂရဲ့ ပါလက်စတိုင်းဒုက္ခသည် အကူအညီပေးရေး အေဂျင်စီက ဝန်ထမ်းတွေ ပါဝင်ခဲ့တယ်ဆိုတဲ့ စွပ်စွဲမှုတွေကြောင့် အေဂျင်စီအတွက် ရန်ပုံငွေ ဆက်လက်ထောက်ပံ့နိုင်မှု ရှိ၊ မရှိ ပြန်လည်သုံးသပ်သွားမယ်လို့ ဥရောပကော်မရှင်က ပြောပါတယ်။

ဥရောပသမဂ္ဂအဖွဲ့ဝင် ဂျာမနီ၊ အီတလီ၊ နယ်သာလန်နဲ့ ဖင်လန်တို့အပါအဝင် နိုင်ငံအများအပြားဟာ ဂါဇာက အကူအညီ ပေးရေး ဝန်ထမ်း ၁၃,၀၀၀ မှာ တိုက်ခိုက်သူ ၁၂ ဦး ပါဝင်တယ်လို့ အစ္စရေးက စွပ်စွဲပြီးနောက် အေဂျင်စီအတွက် ရန်ပုံငွေ ထည့်ဝင်မှု ခေတ္တရပ်ဆိုင်းခဲ့ပါတယ်။

ရန်ပုံငွေ ဆိုင်းငံ့မှုကို ပြန်စဉ်းစားဖို့ ကုလသမဂ္ဂ အရာရှိတွေက တိုက်တွန်းခဲ့ပြီး ဟားမာ့စ်တိုက်ခိုက်မှုမှာ ပါဝင်ပတ်သက်တဲ့ ဝန်ထမ်းတွေကို အပြစ်ပေးမယ်လို့ ကတိပြုခဲ့ပါတယ်၊ ရန်ပုံငွေဆိုင်းငံ့မှုက ဂါဇာမှာရှိတဲ့ လူနှစ်သန်းလောက်ကို ထောက်ပံ့ကူညီမှုမှာ အန္တရာယ် ကြုံရနိုင်တယ်လို့လည်း သတိပေးလိုက်ပါတယ်။

ဥရောပကော်မရှင်ဟာ ဂါဇာကမ်းမြှောင်နဲ့ အနောက်ဘက်ကမ်းက ပါလက်စတိုင်းတွေကြား လူသားချင်း စာနာထောက်ထားမှုဆိုင်ရာ အကူအညီတွေ လိုအပ်မှုအတွက် နှစ်ဖက်စလုံးကို ချိန်ခွင်လျှာညှိဖို့ ကြိုးပမ်းသွားမယ်လို့ အီးယူ ပြောရေးဆိုခွင့်ရှိသူတစ်ဦးက ပြောပါတယ်။