အမေရိကန်နိုင်ငံ ဂျော်ဂျီယာပြည်နယ်က ဓာတုဗေဒစက်ရုံတစ်ခုမှာ မီးလောင်ပေါက်ကွဲမှု တနင်္ဂနွေနေ့က ဖြစ်ပွား ခဲ့လို့ လူအများအပြား နေရာရွှေ့ပြောင်းပေးခဲ့ရပြီး အဝေးပြေးလမ်းမကြီးတစ်ခုကိုလည်း ပိတ်ထားခဲ့ရပါတယ်။
စက်ရုံမီးလောင်ပေါက်ကွဲမှုကနေ မီးညွှန့်မီးလျှံတွေနဲ့အတူ မီးခိုးတွေ ထွက်ပေါ်လာတကို ဗီဒီယိုဖိုင်မှာ အခုလို တွေ့ရပါတယ်။ အစပိုင်းမှာ အဲဒီမီးကို ထိန်းချုပ်နိုင်ခဲ့ပေမဲ့ စက်ရုံရဲ့ Biolab နေရာမှာ ထပ်မံ လောင်ကျွမ်းခဲ့တာလို့ အတ္တလန္တာဂျာနယ်က ရေးသားဖော်ပြပါတယ်။
စက်ရုံမီးဟာ Sprinkler head (စပရင်ကလာ ဟတ်ဒ်) လို့ခေါ်တဲ့ စက် အစိတ်အပိုင်းတစ်ခု ချို့ယွင်းမှုဖြစ်ရာကနေ ဒေသစံတော်ချိန် မနက် (၅)နာရီ ခွဲလောက်မှာ မီးထတောက် တာလို့ စက်ရုံတည်ရှိရာ ရော့ခ်ဒေးလ်ခရိုင် မီးသတ်တပ်ဖွဲ့ အကြီးအကဲက ပြောပါတယ်။
အဲဒီ ဓာတုစက်ရုံ မီးလောင်မှုကြောင့် ရော့ခ်ဒေးလ် ခရိုင်တစ်ခုလုံးက ဒေသခံ(၁၇၀၀၀)ကို ဘေးလွတ်ရာကို ရွှေ့ပြောင်းဖို့ ညွှန်ကြားခဲ့ရပါတယ်။
လက်ရှိမှာတော့ မီးလောင်မှုဖြစ်ခဲ့တဲ့ အဲဒီစက်ရုံနေရာကို သဘာ၀ပတ်ဝန်းကျင် ကာကွယ်ရေး အေဂျင်စီနဲ့ ဂျော်ဂျီယာပြည်နယ် အရေးပေါ်စီမံခန့်ခွဲရေးအေဂျင်စီက တာဝန်ရှိသူတွေက ကွင်းဆင်းစစ်ဆေးနေပြီးတော့ မီးခိုးကနေ ထွက်ပေါ်လာနိုင်တဲ့ အဆိပ်အခိုးအငွေ့တွေရဲ့ ဘေးရန်ကိုလည်း သတိပြုကြဖို့ တာဝန်ရှိသူတွေက လမ်းညွှန်ထားပါတယ်။
