ငြိမ်းချမ်းရေးနိုဘယ်ဆိုရှင် အမေရိကန်သမ္မတ Jimmy Carter ရဲ့ဈာပနအခမ်းအနားကို ဇန်နဝါရီလ ၉ ရက်နေ့က စည်းကားသိုက်မြိုက်စွာကျင်းပခဲ့ပါတယ်။အခုလို ရုန်းရင်းဆန်ခတ်ဖြစ်ရတဲ့ အချိန်တွေမှာ ရှားရှားပါးပါး စည်းလုံးမှုပြတဲ့အနေနဲ့ ဝါရှင်တန်က အမျိုးသား ဘုရားရှိခိုးကျောင်းမှာ အမေရိကန်သမ္မတ Jimmy Carter အတွက် ဈာပနအခမ်းအနား ကျင်းပခဲ့တာကို NBC သတင်းမှာ ရေးသားထားပါတယ်။
အမေရိကန်သမ္မတဟောင်း ဂျင်မီကာတာကို ဂုဏ်ပြုတဲ့အနေနဲ့ သက်ရှိ ထင်ရှားရှိနေတဲ့ အမေရိကန်သမ္မတတွေ တက်ရောက်ခဲ့ကြပါတယ်။ အမေရိကန် ပြည်ထောင်စုမှာ သမ္မတဂျင်မီ ကာတာအတွက် ပြီးခဲ့တဲ့ ဇန်နဝါရီလ ၉ ရက်က တစ်နိုင်ငံလုံးဝမ်းနည်းပူဆွေးရတဲ့ နေ့အဖြစ် သတ်မှတ်ပြီး နိုင်ငံတော် ဈာပနအနေနဲ့ ကျင်းပခဲ့တာပါ။ အစိုးရရုံး အများအပြားပိတ်ထားသလို ၃၉ ဆက်မြောက် အမေရိကန် သမ္မတရဲ့ နိုင်ငံတော် ဈာပနကျင်းပရာ ဝါရှင်တန် အမျိုးသား ဘုရားရှိခိုးကျောင်းမှာ အမေရိကန်ထိပ်တန်း ပုဂ္ဂိုလ်တွေ လာရောက် စုဝေး ဂုဏ်ပြုခဲ့ကြပါတယ်။
ရှေ့တန်းမှာ အမေရိကန်သမ္မတတွေနဲ့ ဒုသမ္မတတွေ၊ ရီပတ်ဘလီကန်နဲ့ ဒီမိုကရက်တစ်ပါတီတွေ ပါဝင်တက်ရောက်ခဲ့ကြပါတယ်။ ရွေးကောက်ခံသမ္မတ ဒေါ်နယ်ထရမ့် နဲ့ သက်ရှိထင်ရှားရှိနေဆဲ သမ္မတဟောင်းတွေ ဖြစ်တဲ့ ဘေလ်ကလင်တန်၊ ဂျောဒလျူဘုရှ်၊ ဘားရက်ခ် အိုဘားမား နဲ့ ဂျိုးဘိုင်ဒန်တို့ ၅ ဦး တက်ရောက်ခဲ့ကြတာ ဖြစ်ပြီး သမ္မတဘိုင်ဒန်က ကွယ်လွန်သူအတွက် အမှတ်တရ ဂုဏ်ပြုစကား ပြောကြားခဲ့ပါတယ်။
