လူကုန်ကူးခံ တရုတ်နိုင်ငံသားများ နေရပ်ပြန်ရေး ထိုင်းသို့ တရုတ်ဒုတိယဝန်ကြီး လာရောက်

တရုတ်အစိုးရဒုတိယဝန်ကြီးတစ်ဦးဟာ ကျားဖြန့်ဂိုဏ်းတွေရဲ့ လူကုန်ကူးခြင်း ခံခဲ့ရတဲ့ တရုတ်နိုင်ငံသားတွေကို နေရပ်ပြန်လည်ခေါ်ယူရေးကိစ္စမှာ ကိုယ်တိုင် လက်ခံကြိုဆိုသွားဖွယ် ရှိနေတယ်လို့ The Nation Thailand သတင်းမှာရေးသားထားပါတယ်။

တရုတ်ပြည်သူ့လုံခြုံရေး ဒုတိယဝန်ကြီး လျူရှောင်ယီဟာ ဖေဖော်ဝါရီ ၁၆ ရက်နေ့က ထိုင်းနိုင်ငံ၊ မဲဆောက် ခရိုင်ကို ရောက်ရှိလာခဲ့ပြီး ရာနဲ့ချီတဲ့ လူကုန်ကူးခံ တရုတ်နိုင်ငံသားတွေကို ပြန်လည် ခေါ်ယူရေး ကိစ္စမှာ အနီးကပ် ကိုင်တွယ်သွားဖွယ် ရှိတယ်လို့ ထိုင်းမီဒီယာတွေမှာ ဖော်ပြထားပါတယ်။

လျူရဲ့ ခရီးစဉ်ကို သူလာရောက်မယ့်နေ့ မနက်ပိုင်းကျမှ ထိုင်းနိုင်ငံ၊ တက်ခ်ပြည်နယ်ရဲ့ အာဏာပိုင် အရာရှိတွေက လက်ခံရရှိခဲ့တာပါ။ အစောပိုင်းမှာ လျူရဲ့ ခရီးစဉ်ကို လျှို့ဝှက်ထားခဲ့တာလို့လည်း သိရပါတယ်။

လျူဟာ ထိုင်းနိုင်ငံ၊ ဘန်ကောက်မြို့တော်ရဲ့ ဒွန်မောင်း လေဆိပ်ကို မနက်ပိုင်းမှာ ရောက်ရှိခဲ့ပြီး ညနေပိုင်းမှာတော့ မဲဆောက်နဲ့ မြဝတီကြားမှာ ကျားဖြန့် သားကောင်တွေ ကယ်ဆယ်ရေး လုပ်ငန်းစဉ်တွေနဲ့ ပတ်သက်ပြီး ကနဦးအဆင့် လေ့လာမှုတွေ စတင်ခဲ့တယ်လို့ ဆိုပါတယ်။

လျူဟာ ဒွန်မောင်းကနေ မဲဆောက်ကို Nok Air လေကြောင်းလိုင်းနဲ့ ခရီးဆက်လာခဲ့ပြီး သူဦးဆောင်တဲ့ ကိုယ်စားလှယ် အဖွဲ့မှာ အရာရှိ ၂၆ ဦး ပါဝင်တယ်လို့ ဆိုပါတယ်။

လျူဟာ မဲဆောက်ကို ဒုတိယ အကြိမ်မြောက် ရောက်ရှိခဲ့တာ ဖြစ်ပါတယ်။ မဲဆောက်မှာရှိတဲ့ သတင်းရင်းမြစ်တွေအရ လူကုန်ကူးခံရတဲ့ တရုတ်နိုင်ငံသား ၆၀၀ လောက်ကို ပထမ အသုတ်အဖြစ် တရုတ်နိုင်ငံဆီ ပြန်ပို့မယ့် ကိစ္စကို လျူက စောင့်ကြည့်သွားဖွယ် ရှိနေတယ်လို့ သိရပါတယ်။

ထိုင်းအာဏာပိုင်တွေရဲ့ အဆိုအရ တရုတ်ဒုစရိုက်ဂိုဏ်းတွေ ကွပ်ကဲပြီး လည်ပတ်နေတဲ့ အဲဒီ ကျားဖြန့် လုပ်ငန်းတွေမှာ လူကုန်ကူးပြီး ခိုင်းစေခံရသူ အများစုဟာ ထိုင်းရဲ့ အိမ်နီးချင်း နိုင်ငံတွေဆီက ဖြစ်တယ်လို့လည်း သိရပါတယ်။