ယူကရိန်းသို့ တပ်များ စေလွှတ်ရန် ဗြိတိန်အသင့်ရှိနေ

ငြိမ်းချမ်းရေးစာချုပ်ရဲ့ တစ်စိတ်တစ်ဒေသအဖြစ် ယူကရိန်းရဲ့ လုခြုံရေးကို အာမခံချက်ပေးဖို့အတွက် တပ်ဖွဲ့ဝင် တွေ စေလွှတ်ဖို့ အဆင်သင့်ရှိနေတယ်လို့ ဗြိတိန်ဝန်ကြီးချုပ် ကားရ် စတာမာ က ပြောလိုက်ပါတယ်။

အနာဂတ်မှာ ပူတင်ရဲ့ နောက်ထပ် ကျူးကျော်တိုက်ခိုက်မှုတွေကို တားဆီးဖို့ဆိုရင် ယူကရိန်းမှာ ရေရှည်တည်တံ့တဲ့ ငြိမ်းချမ်းရေးရှိဖို့ဟာ အလွန်အရေးကြီးတယ်လို့ ပြောပါတယ်။

ဒါဟာ ဗြိတိန်စစ်တပ်အကြီးအကဲဟောင်းက ဗြိတိန်စစ်တပ်ဟာ အင်အားမလုံလောက်တဲ့အတွက် နောက်ထပ် ငြိမ်းချမ်းမှုထိန်းသိမ်းရေးမစ်ရှင်တွေကို ဦးဆောင်နိုင်စွမ်းမရှိတော့ဘူးလို့ ပြောဆိုအပြီးမှာ ဝန်ကြီးချုပ်ရဲ့ အခု ပြောဆိုချက်ထွက်ပေါ်လာတာပါ။ တနင်္လာနေ့မှာ ပဲရစ်မှာ ပြုလုပ်မယ့် ဥရောပခေါင်းဆောင်တွေရဲ့ အရေးပေါ် ထိပ်သီး အစည်းအဝေးမတိုင်ခင်မှာ ကားရ်က အခုလိုပြောသွားတာလည်းဖြစ်ပါတယ်။

အခုစကားကို ပေါ့ပေါ့တန်တန်ပြော နေတာမဟုတ်ဘဲ ဗြိတိန် စစ်သည်တွေကို အန္တရာယ်ရှိတဲ့ နေရာမှာ စေလွှတ်ရမယ့် တာဝန်တစ်ရပ်ရှိနေပြီလို့ နက်နက်ရှိုင်းရှိုင်း ခံစားရလို့ အခုလိုပြောဆိုတာဖြစ်ကြောင်း ကားရ်က Daily Telegraph သတင်းစာကို ပြောပါတယ်။ ယူကရိန်းရဲ့ လုံခြုံရေးကို အာမခံပေးတာဟာ ဥရောပတိုက်တစ်ခုလုံးရဲ့ လုံခြုံရေး နဲ့ ဗြိတိန်ရဲ့ လုံခြုံရေးကို အာမခံပေးရာရောက်တယ်လို့ လည်း ဆက်ပြောပါတယ်။

ယူကရိန်းမှာ ရုရှားရဲ့ စစ်ဆင်မှုတွေ ရပ်သွားတဲ့အခါ အဲဒီရပ်နားမှုဟာ နောက်ထပ် တိုက်ခိုက်မှုတွေ မလုပ်ခင် ယာယီရပ်နားမှုမျိုးမဖြစ်ဖို့ လိုတယ်လို့ သူက ပြောပါတယ်။ ဗြိတိန်စစ်သည်တွေကို တခြား ဥရောပနိုင်ငံတွေက တပ်ဖွဲ့ဝင်တွေနဲ့အတူ ယူကရိန်း နဲ့ ရုရှားထိန်းချုပ်နယ်မြေတွေအကြား နယ်စပ်တစ်လျှောက်မှာ စေလွှတ်တပ်ဖြန့်ဖွယ်ရှိနေပါတယ်။