ဗြိတိန်ရေပိုင်နက်ထဲကို ဒုတိယ အကြိမ်အဖြစ် ရုရှားသူလျှိုသင်္ဘောတစ်စင်း ဝင်ရောက်ခဲ့တဲ့နောက် ဗြိတိန်က သူရဲ့ရေပိုင်နက်ကို ရုရှားရဲ့ လျှို့ဝှက်ထောက်လှမ်းရေး စစ်ဆင်ရေးတွေကနေ ကာကွယ်ဖို့ လုံခြုံရေးတိုးမြှင့် လိုက်ပါတယ်။ ယန်တာလို့ခေါ်တဲ့ ရုရှားသူလျှိုသင်္ဘောဟာ အင်္ဂလိပ်ရေလက်ကြားကို အခုသီတင်းပတ်အတွင်းမှာ ဖြတ်သန်းခုတ်မောင်းသွားတယ်လို့ ဗြိတိန် ကာကွယ်ရေးဝန်ကြီးဌာနကို ကိုးကားပြီး ဘီဘီစီက ပြောပါတယ်။
ရေလက်ကြားကို ဖြတ်သန်းစဉ်မှာ ဗြိတိန်စစ်သင်္ဘော HMS ဆိုမားဆက် က ထက်ကြပ်မကွာ လိုက်လံ စောင့်ကြည့်ခဲ့တယ်လို့ ပြောပါတယ်။အဲဒီ ယန်တာ သူလျှိုသင်္ဘောဟာ ဗြိတိန်ရေပြင်ထဲကို နိုဝင်ဘာလထဲက တစ်ခါဝင်ရောက်ခဲ့ပြီး အရေးကြီးတဲ့ ရေအောက် အခြေခံအဆောက်အအုံတွေရှိရာ ရေပြင်ပေါ်မှာ လှည့်လည်နေခဲ့တယ်လို့ ပြောပါတယ်။ ဗြိတိန် ရေငုပ် သင်္ဘောတစ်စင်းက သတိပေးတဲ့နောက် မြေထဲပင်လယ်ကို ယန်တာသင်္ဘော ထွက်သွားပြီး အခုတစ်ခါ ပြန်ဝင် လာတာလို့ ပြောပါတယ်။
နိုင်ငံတကာ ရေပိုင်နက်တွေမှာ ရုရှားရဲ့ အဖျက်အမှောင့်လုပ်ရပ်၊ ယူကရိန်းက ရုရှားရဲ့ စစ်ဆင်တိုက်ခိုက်မှုတွေနဲ့ ဘောလ်တစ်ပင်လယ်ထဲက ဖြစ်စဉ်တွေကြောင့် စိုးရိမ်မှုတွေ မြင့်တက်နေချိန်မှာ ယန်တာသင်္ဘော ကိစ္စပေါ်ပေါက်လာတာဖြစ်ပါတယ်။ ရုရှားဘက်ကတော့ အဲဒီဖြစ်စဉ်နဲ့ ပတ်သက်ပြီး ဗြိတိန်ရဲ့ ထုတ်ပြန်ချက်အပေါ် မှတ်ချက်ပြုဖို့ ငြင်းဆန်ထားပါတယ်။
