အစ္စရေး-ဟားမာ့စ် စစ်ပွဲဖြစ်ပွားပြီးနောက်ပိုင်း ပထမဆုံးအကြိမ်အနေနဲ့ ဂါဇာကမ်းမြောင်မြောက်ပိုင်းမှာ ထောင်နဲ့ ချီတဲ့ ပါလက်စတိုင်းတွေက ဟားမာ့စ်အဖွဲ့ကို ဆန့်ကျင် ဆန္ဒထုတ်ဖော်ခဲ့ကြပါတယ်။ ဂါဇာမြောက်ပိုင်း ဘေ့တ် လဟီယာမြို့က လမ်းမတွေပေါ်မှာ မတ်လ ၂၅ ရက်က ဆန္ဒထုတ်ဖော်ခဲ့တာဖြစ်ပြီး “ဟားမာ့စ်အဖွဲ့ထွက်သွား”၊ “ကျွန်ုပ်တို့ စစ်ပွဲကို အဆုံးသတ်စေချင်တယ်” စတာတွေကို ကြွေးကြော်ခဲ့ကြပါတယ်။မျက်နှာဖုံးစွပ်ထားပြီး သေနတ်နဲ့ နံပါတ်တုတ်အချို့ ကိုင်ဆောင်ထားတဲ့ ဟားမာ့စ်စစ်သွေးကြွတွေက ဆန္ဒ ထုတ်ဖော်သူတွေကို လူစုခွဲခဲ့တယ်လို့ BBC က ရေးသားပါတယ်။
ဆိုရှယ်မီဒီယာတွေမှာ မျှဝေထားတဲ့ စာတစ်စောင်အရ မတ်လ ၂၆ ရက်မှာလည်း ဂါဇာကမ်းမြောင်တစ်ခွင်မှာ ဟားမာ့စ်ဆန့်ကျင်ရေး ၉ ခုလောက် ပြုလုပ်ဖို့ ပွဲစီစဉ်သူတွေက တိုက်တွန်းထားတယ်လို့ CNN သတင်းမှာ ဖော်ပြပါတယ်။ဟားမာ့စ်အဖွဲ့ကို ထောက်ခံသူတွေကတော့ ဆန္ဒထုတ်ဖော်သူတွေကို သစ္စာဖောက်တွေလို့ စွပ်စွဲခဲ့ပြီး ဟားမာ့စ် အဖွဲ့ဘက်ကတော့ ဒီကိစ္စနဲ့ ပတ်သက်လို့ တစ်စုံတစ်ရာ မှတ်ချက် မပေးသေးပါဘူး။ အစ္စရေး-ဟားမာ့စ်စစ်ပွဲ မတိုင်မီကတည်းက ဟားမာ့စ်အဖွဲ့ကို ဆန့်ကျင်တဲ့ ပါလက်စတိုင်းတွေ ရှိခဲ့ပေမယ့် အများစုဟာ ဟားမာ့စ်ကို ကြောက်ရွံ့တဲ့အတွက် ပေါ်ပေါ်တင်တင် ဆန့်ကျင်ရဲတာမျိုး မရှိပါဘူး။ဟားမာ့စ်အဖွဲ့ဟာ ပါလက်စတိုင်း ၂ ဒသမ ၁ သန်းလောက် နေထိုင်တဲ့ ဂါဇာကမ်းမြောင်ကို ၂၀၀၇ ခုနှစ်ကတည်း က ထိန်းချုပ်ထားတာ ဖြစ်ပါတယ်။
အပစ်အခတ်ရပ်စဲရေး သက်တမ်းတိုးဖို့အတွက် အမေရိကန်ရဲ့ အဆိုပြုချက် အသစ်ကို ဟားမာ့စ်အဖွဲ့က ပယ်ချခဲ့တယ်လို့ အစ္စရေးက စွပ်စွဲထားပြီး ပြီးခဲ့တဲ့ မတ်လ ၁၈ ရက်မှာ ဂါဇာ ကမ်းမြောင်ကို ထိုးစစ်တွေ ပြန်စတင်ခဲ့တာပါ။ ဒီလိုထိုးစစ်တွေ ပြန်လည်စတင်ချိန်ကစလို့ ဂါဇာမှာ ပါလက် စတိုင်း ရာနဲ့ချီ သေဆုံးခဲ့ပြီး ထောင်နဲ့ချီတဲ့ ပါလက်စတိုင်းတွေ အိုးအိမ်စွန့်ခွာ ထွက်ပြေးခဲ့ရပါတယ်။စစ်ပွဲစတင်တဲ့ ၂၀၂၃ နှောင်းပိုင်းကနေ လက်ရှိအချိန်အထိ ပါလက်စတိုင်း ၅ သောင်းကျော် သေဆုံးခဲ့တယ်လို့ ဂါဇာကျန်းမာရေးဝန်ကြီးဌာနက ထုတ်ပြန်ထားပြီး လက်ရှိမှာလည်း အစ္စရေးရဲ့ ပိတ်ဆို့မှုတွေကြောင့် ဂါဇာမှာ အစားအစာ၊ ရေ၊ ဆေးဝါးနဲ့ လောင်စာဆီတွေ အကြီးအကျယ် ပြတ်လပ်နေပါတယ်။
