KLM Royal Dutch လေကြောင်းလိုင်းက လေယာဉ်တစ်စင်း ဟိုက်ဒရောလစ်စနစ် ချို့ယွင်းမှုကြောင့် နော်ဝေက Sandefjord လေဆိပ်မှာ ဒီနေ့မနက်ပိုင်းက အရေးပေါ်ဆင်းသက်ခဲ့ရပါတယ်။
ဒီအဖြစ်အပျက်ဟာ လူရာနဲ့ချီ သေဆုံးစေခဲ့တဲ့ တောင်ကိုရီးယား အနောက်တောင်ပိုင်းက လေယာဉ်ပျက်ကျမှုဖြစ်စဥ်အပြီး နာရီပိုင်းအကြာမှာ ဖြစ်ပွားခဲ့တာပါ။
ကနေဒါနိုင်ငံ ဟာလီဖက်ရှ် လေဆိပ်မှာလည်း Air Canada လေကြောင်းက လေယာဉ်တစ်စင်း ဆင်းသက်စဉ်အတွင်း မီးလောင်မှု ဖြစ်ပွားခဲ့တာကြောင့် ပြီးခဲ့တဲ့ ၂၄ နာရီအတွင်းမှာ လေယာဉ်မတော်တဆမှု ၃ ကြိမ်အထိ ဖြစ်ပွားခဲ့တာ ဖြစ်ပါတယ်။
KLM Royal Dutch လေကြောင်းလိုင်းက လေယာဉ်ဟာလည်း ဘိုးရင်း 737-800 လေယာဉ်ဖြစ်ပြီး နော်ဝေနိုင်ငံ အော်စလိုလေဆိပ်ကနေ နယ်သာလန်နိုင်ငံ အမ်စတာဒမ်ကို ပျံသန်းခဲ့တာဖြစ်ပါတယ်။
အော်စလိုလေဆိပ်ကနေ ထွက်ခွာလာပြီး မကြာခင်မှာ ဟိုက်ဒရောလစ်စနစ် ချို့ယွင်းမှုဖြစ်တာကြောင့် အနီးမှာရှိတဲ့ Sandefjord လေဆိပ်ကို အရေးပေါ် ဆင်းသက်ခဲ့တာပါ။
လေယာဉ်ဆင်းသက်ပြီးနောက် ပြေးလမ်းက ချော်ထွက်ပြီး မြက်ခင်းပေါ်ကျခဲ့ပေမယ့် ပြင်းထန်တဲ့ ထိခိုက်မှုတော့ မရှိခဲ့ပါဘူး။
ဒီ့အတွက် လေယာဉ်ပေါ်ပါတဲ့ ခရီးသည် ၁၇၆ ဦးနဲ့ လေယာဉ်အမှုထမ်း ၆ ဦးတို့ ထိခိုက်ဒဏ်ရာရတာ မရှိခဲ့ဘူးလို့ သိရပါတယ်။
လေယာဉ်ရဲ့ ဟိုက်ဒရောလစ်စနစ် ချို့ယွင်းမှုနဲ့ ပတ်သက်ပြီး အာဏာပိုင်တွေက စုံစမ်းစစ်ဆေးမှုတွေ လုပ်ဆောင်နေပါတယ်။
