ထိုင်းဝန်ကြီးချုပ် Paetongtarn Shinawatra ရဲ့ လေးရက်ကြာ တရုတ်ခရီးစဉ်ဟာ ဖေဖော်ဝါရီ ၅ ရက်မှာ စတင်ခဲ့ ကြောင်း The Nation Thailand သတင်းမှာ ရေးသားထားပါတယ်။ ခရီးစဉ်အတွင်း တရုတ်သမ္မတ ရှီကျင့်ဖျင်နဲ့ တွေ့ဆုံဆွေးနွေးသွားမှာဖြစ်ပြီး စီးပွားရေးနဲ့ ကုန်သွယ်ရေး ဆက်ဆံမှုကို အဓိကထား ဆွေးနွေးသွားဖို့ ရှိတယ်လို့ ဆိုပါတယ်။
ဒါ့အပြင် ထိုင်းနိုင်ငံရဲ့ခရီးသွားလုပ်ငန်းအပေါ် တရုတ်ခရီးသွားတွေရဲ့ ယုံကြည်မှု တိုးမြင့်လာစေရေး အတွက်လည်း ဘေဂျင်းရဲ့အကူအညီကို တောင်းခံသွားမှာဖြစ်တယ်လို့ ပြောကြားထားပါတယ်။ဆိုက်ဘာ လူလိမ်ဂိုဏ်းတွေ အထူးသဖြင့် တရုတ်က စိုးရိမ်နေတဲ့ ဒီဂိုဏ်းတွေနဲ့ ပတ်သက်လို့ ထိုင်းနိုင်ငံအနေနဲ့ လုပ်နိုင်တာမှန်သမျှ လုပ်နေကြောင်း ဝန်ကြီးချုပ်က အသေအချာ ပြောလိမ့်မယ်လို့ Lowy Institute အရှေ့ တောင်အာရှ လေ့လာရေးအစီအစဥ်က သုတေသီ Rahman Yaacob က ယူဆပါတယ်။
ကိုဗစ်ကာလတုန်းက နိုင်ငံခြားသားခရီးသွား ကျသွားခဲ့ပေမဲ့ ၂၀၂၄ ခုနှစ်မှာ ထိုင်းနိုင်ငံကို လာရောက်ကြသူ ၃၅ သန်းကျော်အထိ ရှိလာခဲ့ပါတယ်။ အဲဒီထဲမှာ ၆ ဒသမ ၂ သန်းက တရုတ်ခရီးသည်တွေပါ။ ဒါပေမဲ့ မကြာခင်က ဆိုက်ဘာ လူလိမ်ဂိုဏ်းတွေနဲ့ ခရီးသွားလုပ်ငန်း ဆက်စပ်လာမှုကြောင့် ထိုင်းနိုင်ငံအတွက် စိန်ခေါ်ချက်အသစ် ဖြစ်လာခဲ့ရပါတယ်။
