တူကီယဲမှာ ဖြစ်ပွားနေတဲ့ ကြီးမားတဲ့ ဆန္ဒထုတ်ဖော်ပွဲတွေအတွင်း တူကီယဲ အာဏာပိုင်တွေက ဆန္ဒထုတ်ဖော်သူ ၁၄၀၀ ကျော်နဲ့ သတင်းထောက်အများအပြားကို ဖမ်းဆီးထိန်းသိမ်းထားတယ်လို့ နိုင်ငံတကာသတင်းတွေမှာ ဖော်ပြပါတယ်။ ပြီးခဲ့တဲ့ မတ်လ ၁၉ ရက်ကစလို့ တူကီယဲနိုင်ငံတစ်ဝန်းမှာ ဆန္ဒထုတ်ဖော်မှုတွေ ဖြစ်ပွားနေတာ ဖြစ်ပြီး ၆ ရက်ကြာ ကာလအတွင်းမှာ ဆန္ဒထုတ်ဖော်သူ ၁၄၁၈ ယောက်ကို ဖမ်းဆီးထိန်းသိမ်းထားတယ်လို့ တူကီယဲ ပြည်ထဲရေးဝန်ကြီးက ပြောပါတယ်။
ဒါ့အပြင် ပြင်သစ်သတင်းဌာန AFP က ဓာတ်ပုံသတင်းထောက်တစ်ယောက်အပါအဝင် အစ္စတန်ဘူလ်မှာ ဆန္ဒ ထုတ်ဖော်ပွဲတွေအတွင်း သတင်းရယူနေတဲ့ အခြားသတင်းထောက် ၆ ယောက်ဟာလည်း တူကီယဲအာဏာပိုင်တွေ ရဲ့ ဖမ်းဆီးတာကို ခံထားရတယ်လို့ သတင်းမီဒီယာအဖွဲ့တွေက ပြောပါတယ်။ဓာတ်ပုံသတင်းထောက်ကို ဖမ်းဆီးထိန်းသိမ်းထားတဲ့အပေါ် ပြင်းပြင်းထန်ထန် ရှုတ်ချကြောင်းနဲ့ ချက်ချင်း ပြန်လွှတ်ပေးဖို့ တောင်းဆိုကြောင်းနဲ့ ဒီလိုဖမ်းဆီးတာဟာ မီဒီယာလွတ်လပ်ခွင့်ကို ပြင်းပြင်းထန်ထန် တိုက်ခိုက် တာဖြစ်ကြောင်း AFP က ထုတ်ပြန်ကြေညာပါတယ်။
AFP သတင်းထောက်အပြင် အခြားသတင်းထောက် ၆ ယောက်လည်း မတ်လ ၂၅ ရက်မှာ ဖမ်းဆီးခံရတယ်လို့ တူကီယဲ မီဒီယာလွတ်လပ်ခွင့်အဖွဲ့တစ်ခုဖြစ်တဲ့ MLSA က ထုတ်ပြန်ပါတယ်။
AFP သတင်းဌာနရဲ့ ဥက္ကဋ္ဌက တူကီယဲသမ္မတဆီကိုလည်း စာတစ်စောင်ပေးပို့ထားပြီး ဓာတ်ပုံသတင်းထောက်ကို အမြန်ဆုံးပြန်လွှတ်ပေးရေး ကြားဝင်ဆောင်ရွက်ပေးဖို့ တောင်းဆိုထားပါတယ်။ တူကီယဲအစိုးရဟာ ပြည်တွင်းမီဒီယာတွေရဲ့ ၉၀ ရာခိုင်နှုန်း လောက်ကို ထိန်းချုပ်ထားတယ်လို့ နယ်စည်းမခြား သတင်းထောက်များအဖွဲ့က မှတ်ချက်ပေးထားပါတယ်။တူကီယဲသမ္မတ အာဒိုဂန်ရဲ့ အဓိကပြိုင်ဘက်ဖြစ်တဲ့ ရီပတ်ဘလစ်ကန်ပြည်သူ့ပါတီ(CHP)ရဲ့ သမ္မတလောင်း အစ္စတန်ဘူလ်မြို့တော်ဝန် အီမာမိုဂလူ ဖမ်းဆီးအကျဉ်းချခံရပြီးနောက် မြို့တော်အန်ကာရာနဲ့ အစ္စတန်ဘူလ် အပါအဝင် နိုင်ငံတစ်ဝန်းမှာ ကြီးမားတဲ့ဆန္ဒထုတ်ဖော်မှုတွေ ဖြစ်ပေါ်နေတာဖြစ်ပါတယ်။
