ဗြိတိန်နိုင်ငံမှာ အဓိကရုဏ်းတွေဖြစ်စေခဲ့တဲ့ တေလာဆွိစ်ဖျော်ဖြေပွဲ လူသတ်မှုမှာ မိန်းကလေးငယ်(၃)ယောက်ကို သတ်ဖြတ်ခဲ့သူကို အနည်းဆုံး ထောင်ဒဏ်(၅၂)နှစ် ချမှတ်လိုက်ပါတယ်။ အက်ဇဲလ် ရူဒါကူဘာနာ ဆိုသူက ပြီးခဲ့တဲ့ နှစ် ဇူလိုင်လအတွင်းက ဆောက်ပို့တ်မြို့က တောလာဆွိစ်ဖျော်ဖြေပွဲအနီးမှာ မိန်းကလေးတွေကို သတ်ဖြတ် ခဲ့ ကြောင်းနဲ့ နောက်ထပ် (၁၀)ယောက်လောက်ကို ဓားနဲ့ လိုက်ထိုးခဲ့ကြောင်းလည်း ကြာသပတေးနေ့မှာ ဝန်ခံခဲ့ပါ တယ်။
ရူဒါကူဘာနာဟာ အကြမ်းဖက်မှု၊ လူမျိုးတုံးသတ်ဖြတ်မှုတို့ကို စိတ်စွဲလမ်းနေသူဖြစ်တယ်လို့ အစိုးရရှေ့နေ တွေက ပြောပါတယ်။ ဒီအတွက် တရားသူကြီး ဂျူလီယန် ဂူးစ်က ရူဒါကူဘာနာ ဟာ အနည်းဆုံး ထောင်ဒဏ် (၅၂) နှစ် ကျခံသင့်ကြောင်း ဆုံးဖြတ်ပြီး တရားခံဟာ အသက်(၁၇)နှစ်သာ ရှိသေးတာမလို့ ထောင်ဒဏ်တစ်သက် မချ မှတ်နိုင်ကြောင်း ပြောပါတယ်။ ဆောက်ပို့တ်မြိုု့ ဓားထိုးလူသတ်မှုမှာ ဘီဘီ ကင်း အသက်(၆)နှစ်၊ အယ်လ်ဆီယာ ဒေါ့ စတန်းကုမ်း အသက်(၇)နှစ်နဲ့ အဲလစ် ဒါဆီလ်ဗာ အက်ဂွီယာ အသက် (၉)နှစ်တို့ သေဆုံးခဲ့ပါတယ်။ သူတို့ထဲ က နှစ်ယောက်မှာ အနည်းဆုံး ဓားထိုးသွင်းဒဏ်ရာ အနည်းဆုံး(၈၅)ချက်နဲ့ (၁၂၂) ချက်စီ ရရှိခဲ့ပါတယ်။
လူသတ် တရားခံဟာ သေဆုံးသူတွေထဲက တစ်ယောက်ကို အပိုင်းပိုင်းလှီးဖြတ်ခုတ်ထစ်ဖို့ ကြိုးပမ်းခဲ့ပုံပေါ်တယ်လို့ တာဝန် ရှိသူတွေက ပြောပါတယ်။ ရဲတပ်ဖွဲ့က တရားခံ ရူဒါကူဘာနားကို ဖမ်းဆီးချိန်မှာ ဒီကလေးတွေ သေသွားလို့ ဝမ်းသာကြောင်း ဒီလိုသေလို့ သူ့ကို ပျော်ရွှင်စေကြောင်း တရားခံက ရဲတွေကို ပြောခဲ့တယ်လို့ ဆိုပါတယ်။ တရား ခံရဲ့ ကွန်ပျူတာကို စိစစ်ချက်အရ တရားခံဟာ အကြမ်းဖက်မှု၊ သတ်ဖြတ်မှုနဲ့ လူမျိုးတုံးသတ်ဖြတ်မှု အကြောင်း အရာတွေကို စွဲလမ်းနေသူဖြစ်တာကို ဖော်ထုတ် တွေ့ရှိခဲ့ရပါတယ်။ ဒါ့အပြင် ရူဒါကူဘာနာက အယ်လ်ကိုင်ဒါ အကြမ်းဖက်သင်တန်းလက်စွဲစာအုပ်ကို ပိုင်ဆိုင်ကြောင်းနဲ့ ရီဆင်လို့ခေါ်တဲ့ ပြင်းထန်တဲ့ အဆိပ်တစ်မျိုးကိုလည်း ထုတ်လုပ်ကြောင်း ဝန်ခံခဲ့တယ်လို့ တရားသူကြီး ဂျူလီယန် ဂူးစ်က ပြောပါတယ်။
