နျူကလီးယားစွမ်းအင်သုံး အမေရိကန် လေယာဉ်တင်သင်္ဘော သီအိုဒိုရုစဗဲ့ဟာ ပူးတွဲစစ်ရေးလေ့ကျင့်မှုပြုလုပ်ဖို့အတွက် တောင်ကိုရီးယား ဆိပ်ကမ်းမြို့ ဘူဆန်ကို ဇွန် ၂၂ ရက်က ရောက်ရှိလာတယ်လို့ တောင်ကိုရီးယားရေတပ်က ထုတ်ပြန်ခဲ့ပါတယ်။
လေယာဉ်တင်သင်္ဘောအမှုထမ်းတွေဟာ တောင်ကိုရီးယားရေတပ်နဲ့ ဂျပန်ရေတပ်က အမှုထမ်းတွေနဲ့အတူ နည်းဗျူဟာမြောက်လေ့ကျင့်ခန်းတွေ ပြုလုပ်သွားမယ်လို့ အမေရိကန်ရေတပ် အမှတ် ၉ တိုက်ခိုက်ရေးအုပ်စုတပ်မှူး ခရစ္စတိုဖါ အလက်ဇန္ဒားက ပြောပါတယ်။
၂၀၂၃ ခုနှစ် ဩဂုတ်လက ဒေးဗစ်စခန်းမှာ ပြုလုပ်ခဲ့တဲ့ အမေရိကန်၊ တောင်ကိုရီးယားနဲ့ ဂျပန် ခေါင်းဆောင်တွေရဲ့ ထိပ်သီးအစည်းအဝေးမှာ နှစ်ပတ်လည်စစ်ရေးလေ့ကျင့်မှုတစ်ရပ် ပြုလုပ်ဖို့ သဘောတူညီခဲ့ကြပါတယ်။ အဲဒီစည်းဝေးပွဲမှာ တောင်တရုတ်ပင်လယ်တွင်း အငြင်းပွားနေတဲ့ ရေလမ်းကြောင်းမှာ တရုတ်နိုင်ငံရဲ့ အပြုအမူတွေက အန္တရာယ်များတယ်လို့ သုံးနိုင်ငံခေါင်းဆောင်တွေက ပြောဆိုထားပါတယ်။
ရုရှားသမ္မတ ဗလာဒီမာပူတင်ဟာ အခုသီတင်းပတ်အတွင်း မြောက်ကိုရီးယားကို ၂၄ နှစ်အတွင်း ပထမဆုံးအကြိမ် လာရောက်လည်ပတ်ခဲ့ပြီး အပြန်အလှန် ကာကွယ်ရေး ကတိကဝတ်တွေ ပါဝင်တဲ့ ခေါင်းဆောင် ကင်ဂျုံအွန်းနဲ့ သဘောတူညီချက်တစ်ရပ် လက်မှတ်ရေးထိုးခဲ့ပါတယ်။ ဒါဟာ နှစ်များစွာအတွင်း အာရှမှာ ရုရှားရဲ့ အထင်ရှားဆုံး လှုပ်ရှားမှုတစ်ခုဖြစ်ပြီး မဟာမိတ်အဖွဲ့တစ်ခုအဖြစ် ကင်က ဖော်ပြခဲ့ပါတယ်။
မြောက်ကိုရီးယားရဲ့ နျူကလီးယားနဲ့ ဒုံးကျည်အစီအစဉ်တွေကို တိုးချဲ့တားဆီးမှု ပြသတဲ့အနေနဲ့ အမေရိကန် လေယာဉ်တင်သင်္ဘော ကားလ်ဗင်ဆန်ရဲ့ တောင်ကိုရီးယားခရီးစဉ်အပြီး ခုနစ်လအကြာမှာ အခုခရီးစဉ် ထွက်ပေါ်လာတာ ဖြစ်ပါတယ်။
