အနာကြီးရောဂါဖြစ်ပွားသူ လူနာသစ်အရေအတွက်ဟာ သိသာထင်ရှားစွာ လျော့နည်းလာပေမယ့်လည်း ရောဂါ ကူးစက်မှုတွေ ရှိနေဆဲဖြစ်တယ်လို့ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာ သက်ခိုင်ဝင်းက ပြောပါတယ်။ မတ်လ ၁၈ ရက်က နေပြည်တော်မှာ ကျင်းပပြုလုပ်ခဲ့တဲ့ ပြည်သူ့ကျန်းမာရေးဦးစီးဌာန၊ ရောဂါ ကာကွယ် နှိမ်နင်းရေးလုပ်ငန်းများ လုပ်ငန်းဆန်းစစ်ဆွေးနွေးပွဲမှာ အခုလို ပြောကြားခဲ့တာပါ။
အနာကြီးရောဂါလူနာသစ်တွေ ဆက်လက်တွေရှိနေတာကြောင့် ကြိုတင်ကာကွယ်မှုလုပ်ငန်းအနေနဲ့ Rifampicin (ရိုင်ဖန်ပီစင်) ဆေးတစ်ကြိမ် သောက်သုံးခြင်းဖြင့် အနာကြီးရောဂါ ကူးစက်ဖြစ်ပွားနိုင်ခြေကို လျှော့ချနိုင်တယ်လို့ ဆိုပါတယ်။ဒါ့ကြောင့် အနာကြီးရောဂါလူနာနဲ့ အိမ်အတူနေသူတွေကို Rifampicin ဆေးတစ်ကြိမ် တိုက်ကျွေးမယ့် လုပ်ငန်းကို အကောင်အထည်ဖော်ဆောင်ရွက်မှာဖြစ်လို့ Single Dose Rifampicin ဆေးတိုက်ကျွေးခြင်းလုပ်ငန်းနဲ့ ပတ်သက် တဲ့ ဗဟိုအဆင့် ဆရာဖြစ်သင်တန်းနဲ့ တိုင်းဒေသကြီး၊ ပြည်နယ်အဆင့် ဆင့်ပွားသင်တန်းတွေကိုလည်း သင်ကြား ပို့ချပေးမှာဖြစ်တယ်လို့ ပြည်ထောင်စုဝန်ကြီး ဒေါက်တာသက်ခိုင်ဝင်းက ပြောပါတယ်။
ပြီးခဲ့တဲ့ ၂၀၂၃ ခုနှစ် စာရင်းတွေအရ အနာကြီးရောဂါလူနာသစ် ၁၃၃၈ ယောက်၊ ကိုယ်အင်္ဂါချို့ယွင်းမှုအဆင့်(၂) ရှိသူ လူနာသစ် ၂၀၇ ယောက်နဲ့ ကလေးလူနာသစ် ၃၈ ယောက်ကို ရှာဖွေဖော်ထုတ်ပြီး ဆေးဝါးကုသပေးနိုင်ခဲ့ တယ်လို့ သိရပါတယ်။
