ယူကရိန်းနဲ့ဟေတီအပြင် နိုင်ဂျီးရီးယား၊ ကန်ညာတို့လို အာဖရိကနိုင်ငံတွေမှာ HIV ဆေးတွေ မကြာခင် ပြတ်လပ် နိုင်ဖွယ်ရှိတယ်လို့ ကုလသမဂ္ဂ ကမ္ဘာ့ကျန်းမာရေးအဖွဲ့(WHO)က သတိပေးပါတယ်။ အမေရိကန်သမ္မတ ဒေါ်နယ် ထရမ့်ရဲ့ နိုင်ငံတကာအကူအညီတွေ ယာယီရပ်ဆိုင်းထားတဲ့ ဆုံးဖြတ်ချက်ကြောင့် အခုလို အခြေအနေဖြစ်လာ တာဖြစ်ပြီး HIV ဆေးပြတ်တောက်နိုင်တဲ့ နိုင်ငံတွေကတော့ ယူကရိန်း၊ ဟေတီ၊ နိုင်ဂျီးရီးယား၊ ကန်ညာ၊ လီဆိုသို၊ တောင်ဆူဒန်၊ မာလီနဲ့ ဘာကီနာဖာဆိုတို့ ဖြစ်ပါတယ်။
အာဖရိက ဆာဟာရအောက်ပိုင်းမှာရှိတဲ့ လူပေါင်း ၂၅ သန်းခန့်ဟာ HIV ဖြစ်ပွားနေတာဖြစ်ပြီး စစ်ပွဲဖြစ်ပွားနေတဲ့ ယူကရိန်းဟာလည်း အမေရိကန်ရဲ့ အထောက်အပံ့တွေကို အားထားနေရတာကြောင့် လက်ရှိမှာ ဒီနိုင်ငံတွေက HIV ခံစားနေရသူ အများအပြား ဒုက္ခရောက်ဖွယ် ရှိနေတာပါ။ထရမ့်အစိုးရရဲ့ နိုင်ငံတကာအထောက်အပံ့တွေ ရက် ၉၀ ရပ်ဆိုင်းထားတဲ့ ဆုံးဖြတ်ချက်ကြောင့် လာမယ့်လတွေ အတွင်း ARV ဆေးဝါးတွေ ပြတ်တောက်ဖို့ ရှိနေပါတယ်။
ဒီအခြေအနေတွေကြောင့် HIV အစီအစဉ်တွေဟာ နှစ် ၂၀ လောက် နောက်ပြန်ဆုတ်သွားနိုင်တယ်လို့ မတ်လ ၁၇ ရက်က ပြုလုပ်တဲ့ သတင်းစာရှင်းလင်းပွဲမှာ WHO အကြီး အကဲက ပြောပါတယ်။ HIV တိုက်ဖျက်ရေးအစီအစဉ်တွေသာ ရပ်တန့်သွားရင် HIV ကူးစက်ခံရသူ ၁၀ သန်းခန့် ထပ်တိုးနိုင်သလို HIV နဲ့ ဆက်စပ်လို့ သေဆုံးသူဦးရေကလည်း ၃ သန်းလောက် တိုးနိုင်တယ်လို့ WHO အကြီး အကဲက သတိပေးခဲ့ပြီး ပြီးခဲ့တဲ့နှစ်ကထက် သေဆုံးသူအရေအတွက် ၃ ဆတိုးနိုင်တယ်လို့ ပြောပါတယ်။
