ကျန်းမာရေးဝန်ကြီးဌာနနဲ့ JICA တို့ ပူးပေါင်းကာ ရန်ကုန်တိုင်းဒေသကြီး၊ လမ်းမတော်မြို့နယ်မှာ နှလုံး၊ ဦးနှောက်နဲ့အာရုံကြောအထူးကုဆေးရုံကြီး (၇)ထပ်အဆောက်အဦသစ် တည်ဆောက်နေတယ်လို့ ကျန်းမာရေးဝန်ကြီးဌာနကသိရပါတယ်။
ကိုဗစ်-၁၉ ရောဂါကာလအတွင်း ဆောက်လုပ်ရေးလုပ်ငန်းတွေရပ်နားခဲ့ပေမယ့် အခုနှစ်ဇွန်လကစတင်ပြီး ပြင်ဆင်တည်ဆောက်ရေးလုပ်ငန်းတွေ ပြန်လည်စတင်ခဲ့တာဖြစ်တယ်လို့ဆိုပါတယ်။
ဆေးရုံတည်ဆောက်ဖို့ JICA က အမေရိကန်ဒေါ်လာ (၇၇)သန်း ထောက်ပံ့ခဲ့တာဖြစ်ပြီး ကျန်တဲ့ ကုန်ကျစရိတ် အမေရိကန် ဒေါ်လာ (၂၇)သန်းကို မြန်မာဘက်က ကျခံပေးရမှာ ဖြစ်တယ်လို့ သိရပါတယ်။ အဲဒီ ဆေးရုံဟာ အကျယ်အဝန်း (၂၇၀၀၀) စတုရန်းမီတာရှိတဲ့ (၇)ထပ် အဆောက်အဦဖြစ်ပြီး ခုတင်(၃၁၆)ခု ပါဝင်ကာ ICU အခန်းတစ်ခုစီမှာ ခုတင်(၂၀)ကျော် ပါဝင်မှာ ဖြစ်ပါတယ်။ စီမံကိန်း ပြီးစီးရင် နိုင်ငံတကာအဆင့်မီ နှလုံး၊ ဦးနှောက်နှင့်အာရုံကြော အထူးကုဆေးရုံကြီးအဖြစ် ရပ်တည်ကာ ပြည်သူလူထုကို အရည်အသွေးပြည့်ဝတဲ့ ကျန်းမာရေး စောင့်ရှောက်ရေး လုပ်ငန်းတွေ ပိုမိုဆောင်ရွက်ပေးနိုင်မှာ ဖြစ်တယ်လို့ သိရပါတယ်။
