ရန်ကုန်မြို့တော် စည်ပင်သာယာရေးပိုင် သုသာန်တွေမှာ လာမယ့် ဖေဖော်ဝါရီ ၁ ရက်ကစပြီး မီးသင်္ဂြိုဟ်ခတက်မယ်လို့ သက်ဆိုင်ရာ သုသာန်တွေ နဲ့ နာရေးကူညီမှုအသင်းတွေဆီက သိရပါတယ်။လက်ရှိ မီးသင်္ဂြိုဟ်ခ ကျပ် တစ်သောင်းကနေ ကျပ်တစ်သောင်းခွဲအထိ ပြောင်းလဲ ကောက်ခံမှာ ဖြစ်သလို အအေး ခန်း ရေခဲတိုက်ကြေးကလည်း တစ်ရက်ကို ကျပ်ငါးထောင်ကနေ ကျပ် ၉၀၀၀ အထိ ပြောင်းလဲကောက်ခံသွားမှာပါ။
“လက်ရှိ မီးသင်္ဂြိုဟ်ခ ကျပ်တစ်သောင်းကနေ ကျပ်တစ်သောင်းခွဲ ဖြစ်မယ်။ အအေးခန်းထားခ ကျပ်ကိုးထောင် ဖြစ်မယ်။ အဲ့နှစ်ခုတက်မယ်လို့ တရားဝင် အသိပေးထားပါတယ်။ အဓိကတော့ မီးပျက်တာနဲ့ ဆိုင်မယ်။ အအေး ခန်းက လျှပ်စစ်မီးရှိမှ ဖြစ်မှာလေ။ မီးမလာတော့ မီးစက်နှိုးရပုံ ရတယ်။ အဲဒါကြောင့် ဈေးတက်တာ ဖြစ်ပါလိမ့်မယ် ” လို့ ရန်ကုန်မြို့က နာရေးကူညီမှုအသင်း တစ်သင်းရဲ့ တာဝန်ရှိသူတစ်ယောက်က ပြောပါတယ်။
မီးသင်္ဂြိုဟ်ရာမှာ အသုံးပြုတဲ့ သစ်သားကတ်တွေကို အရပ်ဘက် နာရေးကူညီမှုအသင်းတွေ၊ သုသာန်ဝန်ထမ်းတွေနဲ့ နီးစပ်ရင် ကျပ်တစ်သောင်းခွဲနဲ့ ဝယ်ယူနိုင်မှာဖြစ်ပေမဲ့ စည်ပင်ဝန်ထမ်းတွေဆီက တိုက်ရိုက်ဝယ်ယူမယ်ဆိုရင်တော့ ကျပ် ငါးသောင်းလောက်အထိ ဈေးရှိတယ်လို့ ဆိုပါတယ်။ထိန်ပင်သုသာန်က တာဝန်ရှိသူတစ်ယောက်ကလည်း အခုလကုန်ကစပြီး စည်ပင်ပိုင် သုသာန်တွေမှာ မီးသင်္ဂြိုဟ်ခတွေ တက်မယ်ဆိုတာကို အတည်ပြုထားပါတယ်။လက်ရှိ ရုပ်အလောင်းတစ်လောင်းကို မီးသင်္ဂြိုဟ်ဖို့အတွက် စုစုပေါင်း ကုန်ကျစရိတ်ကတော့ လူမှုကူညီရေးအသင်းက အခမဲ့ တိုက်ရိုက်သင်္ဂြိုဟ်ပေးမယ်ဆိုရင် ကျပ်လေးသောင်းခွဲလောက်ထိ ကုန်ကျပြီး ငွေကြေးတတ်နိုင်တဲ့သူတွေ သင်္ဂြိုဟ်မယ်ဆိုရင်တော့ ကျပ် ငါးသိန်းကနေ ကျပ် ၁၀ သိန်းလောက်ထိ ကုန်ကျတယ်လို့ သိရပါတယ်။
ရန်ကုန်စည်ပင်ဧရိယာထဲက မြောက်ဥက္ကလာပ ရေဝေးသုသာန်၊ ရွှေပြည်သာ ကျူချောင်သုသာန်၊ လှိုင်သာယာ ထိန်ပင် သုသာန် နဲ့ တောင်ဒဂုံ ကျီစုသုသာန် နေရာ ၄ ခုစလုံးမှာ ဈေးတက်မှာဖြစ်ပြီး သန်လျင် အမိုးနီသုသာန်ကတော့ စည်ပင်ပိုင် မဟုတ်လို့ မပါဝင်ဘူးလို့ သိရပါတယ်။လတ်တလောမှာတော့ ကျီစု နဲ့ ထိန်ပင်သုသာန်တွေမှာ ရုပ်အလောင်း ၂၀ ကနေ ၃၀ ကြား၊ ရေဝေးသုသာန်မှာတော့ ရုပ်အလောင်း ၄၀ ကနေ ၅၀ ကြားလောက် နေ့စဉ် မီးသင်္ဂြိုဟ်ပေးနေရတယ်လို့ ရန်ကုန်မြို့က နာရေးကူညီမှုအသင်းတွေဆီက သိရပါတယ်။
