ရှမ်းပြည်နယ်(အရှေ့ပိုင်း)၊ တာလေမြို့၊ နားယောင်းကျေးရွာအုပ်စု၊ ဟွေဝုန်းရွာအနီး ပတ်ဝန်းကျင်ကျေးရွာတွေမှာ ဝက်အားနည်းရောဂါ ဖြစ်ပွားပြီး သေဆုံးသွားတဲ့ ဝက်သေတွေကို ရေချောင်းအတွင်း စွန့်ပစ်သူတွေကို တာဝန်ရှိသူ တွေက တားမြစ်ပေးဖို့ လိုအပ်နေတယ်လို့ ဒေသခံတွေက ပြောပါတယ်။
၂၀၂၅ ခုနှစ်၊ ဇန်နဝါရီလ ဒုတိယအပတ်အတွင်းက တာလေမြို့၊ နားယောင်းကျေးရွာအုပ်စု၊ ဟွေဝုန်း၊ ဟာ့ကျကနဲ့ ကျတာ့ရွာတို့မှာ ပထမဆုံး ဝက်သေဆုံးမှုကို တွေ့ရှိရပြီး သေဆုံးနေတဲ့ ဝက်တွေကို ကြိုးတုပ်ပြီး ချောင်း ကမ်းပါး တွေနဲ့ ရေချောင်းထဲကို ပစ်ချသူတွေ ရှိနေတာလို့ ဆိုပါတယ်။တာလေမြို့က ကျေးရွာအချို့မှာ ဝက်တွေ သေဆုံးတာ ပြန်တွေ့နေရပြီး သေဆုံးဝက်တွေကို ချောင်းမြောင်းတွေထဲ စွန့်ပစ်တာတွေ မလုပ်ဖို့နဲ့ စနစ်တကျ မြေမြုပ်စွန့်ပစ်တာတွေလုပ်ဖို့ အသိပညာပေးတာတွေ လုပ်ဆောင်သင့်တယ် လို့ တာလေမြို့ ဟွေဝုန်းရွာက ဒေသခံတစ်ယောက်က ပြောပါတယ်။
ရောဂါကူးစက်ခံရပြီး သေဆုံးတဲ့ ဝက်တွေကို ရောဂါပြန့်ပွားမှု မဖြစ်ပွားအောင် ဝက်မွေးမြူတဲ့ ဒေသခံတွေအနေနဲ့ မိမိတို့ ခြံတွေက ဝက်တွေ ရောဂါလက္ခဏာတွေ ခံစားရတာရှိရင် ကျေးရွာတာဝန်ရှိသူတွေကတစ်ဆင့် မွေးမြူရေး နှင့်ကုသရေးဦးစီးဌာနကို ဆက်သွယ်အကြောင်းကြားဖို့နဲ့ စနစ်တကျ မြေမြှုပ်စွန့်ပစ်ဖို့ လိုအပ်တယ်လို့ သိရပါတယ်။
