ခရမ်းလွန်ရောင်ခြည်အညွှန်းကိန်း မြင့်မားစွာရှိနေတဲ့အချိန်တွေမှာ ခရမ်းလွန်ရောင်ခြည်နဲ့ ထိတွေ့မှုကြောင့် ကျန်းမာရေးအပေါ် သက်ရောက်မှုတွေနဲ့ ကာကွယ်နိုင်မယ့် နည်းလမ်းတွေနဲ့ပတ်သက်လို့ ကျန်းမာရေးဝန်ကြီး ဌာနက ထုတ်ပြန်အသိပေးထားပါတယ်။
ခရမ်းလွန်ရောင်ခြည်နဲ့ ထိတွေ့မှုကြောင့် နေလောင်တာ၊ အသားအရောင်ညိုမည်းတာတွေ ဖြစ်စေနိုင်ပြီး ထိတွေ့မှု ကာလကြာလာတဲ့အခါ မျက်စိတိမ်စွဲတာ၊ အရေပြားတွေ အရွယ်မတိုင်မီ အိုမင်းရင့်ရော်တာ၊ ခုခံအားကျဆင်းလာ တာ၊ အရေပြားကင်ဆာဖြစ်တာ စတဲ့ ဆိုးကျိုးတွေ ဖြစ်ပေါ်စေနိုင်တယ်လို့ ဆိုပါတယ်။
ဒါကြောင့် ခရမ်းလွန်ရောင်ခြည် မြင့်မားစွာကျရောက်နိုင်တဲ့ မနက် ၁၀ နာရီကနေ ညနေ ၄ နာရီအတွင်း နေရောင် ခြည်နဲ့ တိုက်ရိုက်ထိတွေ့တာကို အတတ်နိုင်ဆုံးရှောင်ရှားဖို့၊ အပြင်ထွက်မယ်ဆိုရင် အသားအရေကို နေရောင် ခြည် တိုက်ရိုက်မထိတွေ့စေဖို့ မျက်နှာ၊ လည်ပင်နဲ့ ပခုံးတွေကို လုံခြုံတဲ့ ထီး၊ ဦးထုပ်တို့ဆောင်းတာ၊ ခရမ်းလွန် ရောင်ခြည် အလွယ်တကူ မဖောက်နိုင်တဲ့ အဝတ်အထည်တွေကို ဝတ်ဆင်တာတွေကို လုပ်ဆောင်ရမှာဖြစ်တယ် လို့ ပါရှိပါတယ်။
ခရမ်းလွန်ရောင်ခြည်ဟာ မျက်စိကိုလည်း ထိခိုက်စေနိုင်တာကြောင့် ခရမ်းလွန်ရောင်ခြည်ကို (၉၉)ရာခိုင်နှုန်း အထိ ကာကွယ်ပေးနိုင်တဲ့ နေကာမျက်မှန် တပ်ဆင်တာ၊ အဝတ်ကင်းလွတ်နေတဲ့ လက်၊ လည်ပင်းနဲ့ ပခုံး စတဲ့ နေရာတွေကို သနပ်ခါးထူထူ ဒါမဟုတ် နေလောင်ခံလိမ်းဆေးကို နေရောင်ခြည်ထဲ မထွက်မီ (၁၅)မိနစ်ခန့် ကြိုလိမ်းတာ၊ တစ်ခါလိမ်းပြီး (၂)နာရီကြာပြီးတိုင်း တစ်ခါထပ်လိမ်းတာတွေ လုပ်ဆောင်ရမယ်လို့ ဆိုပါတယ်။
ဒါ့အပြင် ကလေးငယ်နဲ့ သက်ကြီးဘိုးဘွားတွေအနေနဲ့ ခရမ်းလွန်ရောင်ခြည်အန္တရာယ်ကို ပိုမိုခံစားရနိုင်တာကြောင့် အထူးဂရုပြုဖို့ လိုအပ်သလို အသက်တစ်နှစ်အောက်ကလေးငယ်တွေကိုလည်း နေပူထဲကိုခေါ်ဆောင်တာတွေ မပြုလုပ်ဖို့နဲ့ ကလေးတွေကို အရိပ်ထဲမှာသာ ကစားခိုင်းတာတွေ ပြုလုပ်ဖို့လိုတယ်လို့ ထုတ်ပြန်ထားပါတယ်။
