ကန် အကူအညီဖြတ်မှု HIV လူနာ သန်းနှင့်ချီ သေဆုံးနိုင်

အမေရိကန်ရဲ့ ရန်ပုံငွေ ဖြတ်တောက်မှုတွေကြောင့် လာမယ့် ၄ နှစ်အတွင်းမှာ HIV လူနာ ၆ သန်းကျော်လောက် အသက်ဆုံးရှုံးသွားနိုင်တယ်လို့ UNAids အကြီးအကဲက သတိပေးကြောင်း နိုင်ငံတကာသတင်းတွေမှာ ဖော်ပြပါ တယ်။ ဒီရန်ပုံငွေဖြတ်တောက်မှုကြောင့် HIV တိုက်ဖျက်ရေးလုပ်ငန်းတွေ ရပ်ဆိုင်းသွားနိုင်ပြီး တစ်ရက်ကို HIV ကူးစက်ခံရသူ အသစ် ၂၀၀၀ လောက် ထပ်တိုးလာနိုင်တယ်လို့ ဆိုပါတယ်။

HIV အစီအစဉ်တွေအတွက် ရန်ပုံငွေတွေ အပါအဝင် နိုင်ငံခြားအကူအညီတွေ ရပ်ဆိုင်းဖို့ အမေရိကန်အစိုးရရဲ့ ဆုံးဖြတ်ချက်ဟာ ဆိုးရွားတဲ့ အကျိုးဆက်တွေ ဖြစ်လာပြီလို့ UNAids အမှုဆောင်ဒါရိုက်တာ ဝင်နီ ဗျန်ညီမာ (Winnie Byanyima)က ပြောပါတယ်။ရန်ပုံငွေ ဖြတ်တောက်မှုကို ပြန်ပြင်ဆင်ဖို့ ဝင်နီက အမေရိကန်ကို တောင်းဆိုခဲ့ပြီး ဒီဖြတ်တောက်မှုဟာ အထူး သဖြင့် အမျိုးသမီးနဲ့ မိန်းကလေးငယ်တွေကို အပြင်းအထန် ထိခိုက်စေလိမ့်မယ်လို့ ဆိုပါတယ်။ လက်ရှိမှာ အမေရိ ကန်က ငွေကြေးထောက်ပံ့ထားတဲ့ HIV ကုသရေးနဲ့ ကာကွယ်ရေး အစီအစဉ်အများအပြားဟာ အလုပ်ရပ်ဆိုင်းဖို့ အမိန့်ရရှိထားပြီး အာဖရိက,က မိခင်နဲ့ ကလေး ဆေးခန်းတွေကို ပိတ်ထားရသလို ARV ဆေးဝါး ပြတ်တောက်မှု တွေလည်း အပြင်းအထန် ဖြစ်ပေါ်နေပါတယ်။

ဆင်းရဲတဲ့နိုင်ငံတွေမှာ HIV ဆေးဝါး ရှားပါးလာပြီး ကူးစက်မှုနဲ့ သေဆုံးမှုတွေ တိုးမြင့်လာနိုင်သလို ဒါဟာ ၁၉၉၀ ပြည့်လွန်နှစ်တွေက အခြေအနေကို ပြန်ရောက်သွားမယ်လို့ UNAids အကြီးအကဲက သတိပေးပါတယ်။ ၂၀၀၄ ခုနှစ်မှာ HIV ကြောင့် သေဆုံးသူအရေအတွက်ဟာ နှစ်သန်းကျော်ရှိခဲ့ပြီး ၂၀၂၃ ခုနှစ်မှာ ၆ သိန်းအထိ ကျဆင်းခဲ့ ပါတယ်။ ဒါပေမဲ့ အခုလို HIV တိုက်ဖျက်ရေးအစီအစဉ်တွေ ရပ်ဆိုင်းသွားရင် နှစ် ၂၀ ကြာ တိုးတက်မှုတွေက ပြန်ဆုတ်ယုတ်သွားလိမ့်မယ်လို့လည်း WHO အကြီးအကဲက သတိပေးထားပါတယ်။