မြန်မာနိုင်ငံ ရုပ်ရှင်အစည်းအရုံးမှာ ကျင်းပမယ့် မဟာသင်္ကြန်နှစ်သစ်အကြိုပွဲတော်မှာ အသက်(၈၅)နှစ်အထက် သက်ကြီးပူဇော်ပွဲကိုပါ ထည့်သွင်းကျင်းပသွားမယ်လို့ မြန်မာနိုင်ငံရုပ်ရှင်အစည်းအရုံးကနေ သိရပါတယ်။အဲဒီမဟာသင်္ကြန်နှစ်သစ်အကြိုပွဲတော်ကို ဧပြီလ ၉ ရက်မှာ မနက် ၈ နာရီခွဲကနေ ညနေ ၆ နာရီအထိ ဗဟန်းမြို့နယ်၊ ဝင်္ကဘာလမ်းရှိ မြန်မာနိုင်ငံရုပ်ရှင်အစည်းအရုံးမှာ ကျင်းပသွားမှာဖြစ်ပါတယ်။
မနက် ၈ နာရီခွဲကနေ ၁၀ နာရီအထိ ရုပ်ရှင်လောကထဲက အသက်(၈၅)နှစ်အထက် သက်ကြီးဝါကြီးတွေကို မုန့်ဟင်းခါး၊ ကြာဇံဟင်းခါး၊ လက်ဖက်ရည် စတာတွေကို ကျွေးမွေးလှူဒါန်းတာနဲ့အတူ သက်ကြီးပူဇော်ပွဲကို ကျင်းပမှာဖြစ်တယ်လို့ ဆိုပါတယ်။အဲဒီနောက် မနက် ၁၀ နာရီမှာ ရုပ်ရှင်မိသားစုကလေးတွေအတွက် ကစားစရာပစ္စည်းတွေ မဲဖောက်ပေးတာ၊ မနက် ၁၁ နာရီခွဲ အချိန်မှာ နေ့လယ်စာကျွေးမွေးတာနဲ့ နေ့လယ် ၁ နာရီအချိန်မှာ မောင်တို့ချယ်ရီမြေ ဇာတ်ကား ပြသတာနဲ့ ညနေပိုင်းမှာ ဗလာမပါ ကံစမ်းမဲ ဖောက်တာတွေကိုပါ ထည့်သွင်းကျင်းပသွားမယ်လို့ သိရပါတယ်။
