အိန္ဒိယနိုင်ငံရဲ့ နာမည်ကျော်ဂုရုကြီး ရှရီရှရီရာဗီရှန်ကာရဲ့ မြန်မာပြည်ခရီးစဉ် ဂီတ ၊ ပညာဗဟုသုတ နဲ့ တရားထိုင်တဲ့ အစီအစဉ်ကို ဖေဖော်ဝါရီလ ၈ရက်က ရန်ကုန်မြို့ မြို့မကျောင်းလမ်းမှာရှိတဲ့ အမျိူးသားကဇာတ်ရုံမှာ ကျင်းပပါတယ်။ဂုရုကြီးဟာ မြန်မာနိုင်ငံကို ပထမဆုံးအကြိမ် ရောက်ရှိလာတာလည်း ဖြစ်ပါတယ်။
အခမ်းအနားမှာ ဂုရုကြီးရှရီရှရီ ရာဗီရှန်ကာက ဖိတ်ကြားထားတဲ့ ဧည့်သည်တော်တွေနဲ့ တက်ရောက်လာတဲ့ဧည့်ပရိသတ်တွေကို စိတ်ရောကိုယ်ပါ ကျန်းမာချမ်းသာခြင်းအတွက် အသက်ရှုလေ့ကျင့်ခန်းတွေရဲ့ အရေးပါမှုကို မိနစ် ၂၀ကျော်ကြာလမ်းညွှန်သင်ကြားပြသပေးပါတယ်။ဒီအခမ်းအနားကို ရန်ကုန်တိုင်းဒေသကြီး ဝန်ကြီးချူပ်နဲ့ တာဝန်ရှိသူတွေ ၊ မြန်မာနိုင်ငံလုံးဆိုင်ရာ အိန္ဒိယသံအမတ်ကြီး အပါအဝင် သံရုံးအရာရှိတွေ ၊သံတမန်တွေ၊ ဘာသာရေး၊ လူမှုရေး၊ စီးပွားရေး ယဉ်ကျေးမှုနယ်ပယ်က ဧည့်သည်တွေနဲ့ ဖိတ်ကြားထားတဲ့ ဧည့်သည်တော်တွေ တက်ရောက်ကြပါတယ်။
အခမ်းအနားမှာ အိန္ဒိယနိုင်ငံတောင်ပိုင်းဓလေ့အကနဲ့ ဖျော်ဖြေခဲ့သလ်ို မြန်မာ့ရိုးရာယဉ်ကျေးမှုအကတွေနဲ့လည်း ကပြဖျော်ဖြေကြပါတယ်။ဂုရုကြီးဟာ တစ်ကမ္ဘာလုံးက လေးစားရတဲ့ ဘာသာရေးနဲ့ လူသားချင်းစာနာထောက်ထားမှုဆိုင်ရာ ခေါင်းဆောင်တစ်ဦးဖြစ်ပါတယ်။လူသားတန်ဖိုးများ ပြန်လည်နိုးထလာ စေခြင်းဖြင့် အကြမ်းဖက်မှုကင်းစင်သော၊ စိတ်ဖိစီးမှုကင်းသော လူ့အဖွဲ့အစည်း ဖြစ်စေရေးဟာ သူရဲ့အနာဂတ်မျှော်မှန်းချက်ဖြစ်တယ်လို့လည်း သိရပါတယ်။ဂုရုကြီးကို ကိုလံဘီယာ၊ မွန်ဂိုလီးယား၊ ပါရာဂွေး၊ ဆူရီနမ်နဲ့ဖီဂျီနိုင်ငံတို့ရဲ့ အမြင့်ဆုံးအရပ်သားဆုတွေအပါအဝင် ဂုဏ်ထူးဆောင်ဘွဲ့မြောက်မြားစွာ ပေးအပ်ထားကြပါတယ်။
၂၀၁၆ ခုနှစ်မှာ အိန္ဒိယနိုင်ငံရဲ့ အမြင့်ဆုံး နိုင်ငံသားဆုကို ‘Padma Vibhushan’ ဘွဲ့အမည်နဲ့ အပ်နှင်းခြင်းခံခဲ့ရပြီး ကမ္ဘာတစ်ဝန်းကလည်းဂုဏ်ထူးဆောင်ပါရဂူဘွဲ့ ၂၇ ခုကို အပ်နှင်းထားပါတယ်။ဂုရုကြီးဟာ ရုရှား-ယူကရိန်း ငြိမ်းချမ်းရေး ကြိုးပမ်းမှုမှာလည်း အဓိကအခန်းကဏ္ဍမှာ ပါဝင်လုပ်ဆောင်နေတယ်လို့ ဆိုပါတယ်။ဒါ့အပြင် လူသားချင်းစာနာထောက်ထားမှုအကူအညီနဲ့ ပြန်လည်သင့်မြတ်ရေး ကြိုးပမ်းမှုတွေကိုလည်း လုပ်ဆောင်ပေးနေတယ်လို့ သိရပါတယ်။
