မကွေးတိုင်းဒေသကြီးမှာ စိုက်ပျိုးရေးဆိုင်ရာ အလေ့အကျင့်ကောင်းများ (GAP) စနစ်နဲ့ စိုက်ပျိုးထားတဲ့ နှမ်း၊ မြေပဲ တွေ စုပေါင်းရောင်းချပွဲကို ဩဂုတ် ၁၉ ရက်မှာ စတင်ကျင်းပသွားမှာ ဖြစ်တယ်လို့ မကွေးတိုင်းဒေသကြီး တောင်သူဖွံ့ဖြိုးတိုးတက်ရေးအသင်းကနေ သိရပါတယ်။
လက်ရှိဈေးကွက်မှာ အရည်အသွေး ကောင်းမွန်တဲ့ စမုံနှမ်းနက် တစ်တင်းကို ကျပ် နှစ်သိန်း ရှစ်သောင်းနဲ့ နှမ်းဖြူ တစ်တင်းကို ကျပ် တစ်သိန်း ဝန်းကျင်အောက်မှာ အရောင်းအဝယ် ဖြစ်ပါတယ်။GAP စနစ်နဲ့ စိုက်ပျိုးထားတဲ့ နှမ်း၊ မြေပဲတွေ စုပေါင်းရောင်းချပွဲကို ၂၀၁၇ ကတည်းက ကျင်းပလာတာဖြစ်ပြီး တောင်သူတွေအတွက် အဆင်ပြေတယ်လို့ သိရပါတယ်။ GAP စနစ်နဲ့ စိုက်ပျိုးတဲ့ မြေပဲ၊ နှမ်းအပြင် ပဲစင်းငုံ၊ မတ်ပဲ၊ ပဲကြီး၊ ကုလားပဲ၊ စားတော်ပဲ စတဲ့ သီးနှံတွေကိုလည်း စုပေါင်းရောင်းချပွဲ ပြုလုပ်ပေးတယ်လို့ မကွေးတိုင်းဒေသကြီး တောင်သူဖွံ့ဖြိုးတိုးတက်ရေးအသင်းဥက္ကဋ္ဌ ဦးဟန်ညွန့်က ပြောပါတယ်။
နှမ်း၊ မြေပဲ စုပေါင်းရောင်းချပွဲကို မကွေးမြို့၊ သင်ကြားရေးဆေးရုံလမ်းရှိ မြင့်မြတ်တော်ဝင်ကုမ္ပဏီ ဂိုဒေါင်မှာ နှစ်စဉ် ကျင်းပတာ ဖြစ်ပါတယ်။ GAP စနစ်နဲ့ စိုက်ပျိုးတဲ့ သီးနှံတွေဟာ စျေးပိုကောင်းတဲ့အတွက် မကွေးတိုင်း အတွင်းမှာ တစ်နှစ်ထက်တစ်နှစ် ပိုစိတ်ဝင်စားပြီး စိုက်ပျိုးတဲ့တောင်သူတွေ များလာတယ်လို့ သိရပါတယ်။
