တရုတ်နှစ်သစ်ကူးအထိမ်းအမှတ် ဧည့်ခံပွဲ ကျင်းပ

ရန်ကုန်မြို့အခြေစိုက် တရုတ်သံရုံးက ဦးစီးကျင်းပတဲ့ တရုတ်နှစ်သစ်ကူးအထိမ်းအမှတ် ဧည့်ခံပွဲ အခမ်းအနားကို ဇန်နဝါရီ ၂၃ ရက် ညနေပိုင်းက ရန်ကုန်မြို့၊ Inya Lake ဟိုတယ်မှာ ကျင်းပခဲ့တယ်လို့ သတင်းထုတ်ပြန်ပါတယ်။ အဲဒီအခမ်းအနားကို နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ကိုယ်စား နစက အဖွဲ့ဝင် ဒုတိယဝန်ကြီးချုပ်နှင့် ပြည်ထောင်စုဝန်ကြီး ဗိုလ်ချုပ်ကြီး တင်အောင်စန်းနဲ့ဇနီး တက်ရောက် ချီးမြှင့်တယ်လို့ ဆိုပါတယ်။ အခမ်းအနားကို တရုတ်ရိုးရာခြင်္သေ့အက၊ နဂါးအကတွေနဲ့ ကပြဖျော်ဖြေဖွင့်လှစ်ပါတယ်။

တရုတ်နိုင်ငံအနေနဲ့ မြန်မာနိုင်ငံရဲ့ ငြိမ်းချမ်းရေးနဲ့ အမျိုးသားပြန်လည်သင့်မြတ်ရေးလုပ်ငန်းစဉ်မှာ အပြုသဘော ဆောင်တဲ့အကူအညီတွေ ပေးအပ်နေပြီး ဒေသတွင်းက သာမက နိုင်ငံတကာ အသိုက်အဝန်းကပါ တရုတ်နိုင်ငံရဲ့ စဉ်ဆက်မပြတ် အပြုသဘောဆောင်တဲ့ အားပေးထောက်ခံမှုတွေအတွက် များစွာတန်ဖိုးတယ်လို့ ဗိုလ်ချုပ်ကြီး တင်အောင်စန်းက နှစ်သစ်ကူးအထိမ်းအမှတ် နှုတ်ခွန်းဆက်စကား ပြောကြားရာမှာ ထည့်သွင်းပြောကြားခဲ့ ပါတယ်။ ဒါ့အပြင် ၂၀၂၅ ခုနှစ်အတွင်း နှစ်နိုင်ငံပြည်သူတွေအားလုံး ဘယ်လို စိန်ခေါ်မှုမျိုးကိုမဆို ရင်ဆိုင် ကျော်ဖြတ်နိုင်ပြီး ပူးပေါင်းဆောင်ရွက်မှုတွေ တိုးမြှင့်နိုင်ဖို့ ယုံကြည်တယ်လို့လည်း ပြောပါတယ်။

မြန်မာနိုင်ငံဆိုင်ရာ တရုတ်သံအမတ်ကြီး မစ္စ မာကျားကလည်း နှုတ်ခွန်းဆက်စကားပြောကြားရာမှာ တရုတ်-မြန်မာ ဆွေမျိုးပေါက်ဖော်ချစ်ကြည်ရေး အဓွန့်ရှည်ပါစေလို့ ဆုမွန်ကောင်း တောင်းအပ်ပါတယ်လို့ ပြောကြား ခဲ့ပါတယ်။ အဲဒီနောက်မှာတော့ တရုတ်ရိုးရာအကအဖွဲ့၊ မြန်မာ့ရိုးရာအကအဖွဲ့တွေက အကအလှတွေနဲ့ ဖျော်ဖြေ တင်ဆက်ပြီး တက်ရောက်လာသူတွေကို နှစ်သစ်ကူးဂုဏ်ပြုညစာနဲ့ တည်ခင်းဧည့်ခံခဲ့တယ်လို့ သိရပါတယ်။