ကိုရီးယားနိုင်ငံ၊ ဆိုးလ်မြို့မှာ ကျင်းပမယ့် ASEAN-Korea Startup Innovation Week 2025 ပြပွဲမှာ မြန်မာ စီးပွားရေးလုပ်ငန်းရှင်တွေ ပါဝင်ပြသနိုင်ပြီး ပါဝင်ပြသလိုသူတွေအနေနဲ့ မြန်မာကုန်သွယ်မှုမြှင့်တင်ရေး အဖွဲ့၊ ကုန်သွယ်မှုဖွံ့ဖြိုးရေးဌာနခွဲကို ဆက်သွယ်စုံစမ်း စာရင်းပေးသွင်းနိုင်တယ်လို့ သိရပါတယ်။အဲဒီပြပွဲကို ကိုရီးယားနိုင်ငံ၊ ဆိုးလ်မြို့မှာ အောက်တိုဘာလ ၂၀ ရက်ကနေ ၂၂ ရက်နေ့အထိ ကျင်းပသွားမှာ ဖြစ်ပြီး အောက်တိုဘာလ ၂၃ ရက်နဲ့ ၂၄ ရက် ၂ ရက်ကိုတော့ တခြားမြို့နယ်တွေမှာရှိတဲ့ အစိုးရရုံးတွေနဲ့ ပုဂ္ဂလိက လုပ်ငန်းတွေကို သွားရောက်လေ့လာရမှာ ဖြစ်တယ်လို့ ဆိုပါတယ်။
နိုင်ငံခြားရေးဝန်ကြီးဌာနနဲ့ မြန်မာကုန်သွယ်မှုမြှင့်တင်ရေးအဖွဲ့တို့က ရွေးချယ်အတည်ပြုတာခံရတဲ့ အစပျိုး လုပ်ငန်းရှင်တွေရဲ့ ပြည့်စုံစွာဖြည့်စွက်ထားတဲ့ Registration Form ကို ဇူလိုင်လ ၄ ရက်နေ့မှာ အာဆီယံကိုရီးယာ ဗဟိုဌာနကို ပေးပို့ရမှာဖြစ်တယ်လို့ ဆိုပါတယ်။အာဆီယံအဖွဲ့ဝင်နိုင်ငံအသီးသီးက အစပျိုးလုပ်ငန်းရှင်တွေအကြား တီထွင်ဆန်းသစ်မှု အတွေးအခေါ်တွေ ဝေမျှ နိုင်ဖို့၊ အလားအလာရှိတဲ့ ကိုရီးယာစီးပွားရေးလုပ်ငန်းရှင်တွေနဲ့ တွေ့ဆုံနိုင်ဖို့၊ အစပျိုးလုပ်ငန်းရှင်တွေကို စွမ်းဆောင်ရည်မြှင့်တင်ပေးနိုင်ဖို့နဲ့ အာဆီယံနဲ့ ကိုရီးယားသမ္ပတနိုင်ငံရှိ အစပျိုးလုပ်ငန်းရှင်တွေအကြား ကွန်ရက်ခိုင်မာလာစေဖို့ ရည်ရွယ်ပြီး ကျင်းပတာဖြစ်တယ်လို့ သိရပါတယ်။
ကိုရီးယာနိုင်ငံမှာ ဈေးကွက်ထိုးဖောက်ဖို့နဲ့ စီးပွားရေးတိုးချဲ့နိုင်ဖို့ ရည်မှန်းချက်ထားပြီး ကြိုးပမ်းနေတဲ့ အစပျိုး လုပ်ငန်းရှင်တွေ၊ သက်တမ်း ၅ နှစ်အောက်ရှိပြီး ဝန်ထမ်းအင်အား ၃၀ ဦးအောက် ခန့်ထားကာ အခွန်ထမ်းနေတဲ့ အစပျိုးလုပ်ငန်းရှင်တွေ၊ အင်္ဂလိပ်ဘာသာစကား C Level ကို ကျွမ်းကျင်စွာပြောနိုင်၊ ရေးနိုင်၊ ဖတ်နိုင်တဲ့ အစပျိုး လုပ်ငန်းရှင်တွေနဲ့ Ai၊ Mobility Tech၊ Fintech (ဒါမှမဟုတ်) Healthcare Platform အစရှိတဲ့ နည်းပညာ အသုံးပြုတဲ့ ကဏ္ဍတွေအပါအဝင် လူ့ဘောင်လူ့အဖွဲ့အစည်းကို အကျိုးရှိစေမယ့် နည်းပညာအစပျိုးလုပ်ငန်းရှင် တွေလျှောက်ထားနိုင်မှာ ဖြစ်တယ်လို့ ဆိုပါတယ်။ဒါ့အပြင် ရွေးချယ်ခံရတဲ့ အစပျိုးလုပ်ငန်းရှင်တွေအတွက် လေယာဉ်စရိတ်နဲ့ တည်းခိုနေထိုင်စရိတ်တွေကို အာဆီယံ ကိုရီးယားဗဟိုဌာနကနေ ကျခံပေးမှာဖြစ်တယ်လို့ သိရပါတယ်။
