ဂန္ထဝင်မြန်မာသံစဉ်အဆိုတော် ခင်ညွန့်ရည်ဟာ ဖေဖော်ဝါရီ ၂၀ ရက် ည ၁၁ နာရီကျော်လောက်က ကွယ်လွန် သွားတယ်လို့ သူရဲ့ မိသားစုဝင်တစ်ယောက်က လူမှုကွန်ရက်ကတစ်ဆင့် အသိပေးထားပါတယ်။
အဆိုတော် ခင်ညွန့်ရည်ဟာ ပြီးခဲ့တဲ့ ဇန်နဝါရီ ၃၀ ရက်ကစပြီး အဆုတ်ကင်ဆာဝေဒနာနဲ့ ရန်ကုန်ပြည်သူ့ဆေးရုံကြီး ကင်ဆာဌာနမှာ တက်ရောက်ကုသမှု ခံယူနေစဉ် ကွယ်လွန်ခဲ့တာ ဖြစ်ပါတယ်။ ကွယ်လွန်ချိန်မှာ အသက် ၇၅ နှစ် ရှိပြီဖြစ်ပြီး သူရဲ့နာရေးအစီအစဉ်ကိုတော့ မိသားစုဝင်တွေက ထုတ်ပြန်တာ မရှိသေးပါဘူး။
အဆိုတော် ခင်ညွန့်ရည်ဟာ မြန်မာသံစဉ် သီချင်းအပုဒ်ရေ ရာပေါင်းများစွာ သီဆိုခဲ့သူဖြစ်ပြီး ဆောင်းအမီ၊ သောက သူဌေးမလေး၊ ချစ်အရိပ်၊ တိမ်ပလီနွေနှောင်း၊ လက်ပံပွင့်ကောက် အရောက်လာမယ်၊ ပန်းနဲ့ပေါက် တာလည်း နာချင်တယ်၊ မိုးညအိပ်မက်မြူ စတဲ့ သီချင်းတွေဟာ မြန်မာသံစဉ်ပရိသတ်တွေအကြားမှာ ရေပန်းစားခဲ့တဲ့ သီချင်းတွေလည်း ဖြစ်ပါတယ်။
