ရှမ်းပြည်နယ်ရှိ အင်းလေးရေပေါ် သင်္ကြန်ပွဲတော်ကို ဧပြီ(၁၃)ရက် သင်္ကြန်အကြိုနေ့ကနေ ဧပြီ ၁၆ ရက် သင်္ကြန် အတက်နေ့အထိ မြန်မာ့သနပ်ခါးယဉ်ကျေးမှုဓလေ့ကို ဖော်ဆောင်တဲ့ သရုပ်ပြ ဖျော်ဖြေမှုတွေနဲ့အတူ ကျင်းပသွား မယ်လို့ သိရပါတယ်။
အင်းလေးဒေသ ခရီးသွားလုပ်ငန်း ဖွံ့ဖြိုးတိုးတက်လာစေဖို့၊ အင်းသား တိုင်းရင်းသားတွေရဲ့ ရိုးရာယဉ်ကျေးမှု ဓလေ့စရိုက် လက္ခဏာတွေ ဖော်ထုတ် ထိန်းသိမ်းမြှင့်တင်ဖို့၊ တိုင်းရင်းသား အချင်းချင်း ချစ်ကြည်ရင်းနှီးမှု ပိုမို ဖြစ်ထွန်း ခိုင်မာလာစေဖို့၊ မြန်မာတို့ရဲ့ ရိုးရာအတာ သင်္ကြန်ပွဲတော်ကို တမူထူးခြားစွာ စီရင်ကျင်းပ ဖော်ထုတ် ပြသနိုင်ဖို့၊ ပြည်တွင်း၊ ပြည်ပ ခရီးသွားတွေ အေးချမ်းလုံခြုံစွာ သင်္ကြန်ပွဲကို ဆင်နွှဲနိုင်ဖို့ ဆိုတဲ့ ရည်ရွယ်ချက်နဲ့ ကျင်းပပြုလုပ်တာ ဖြစ်တယ်လို့ သိရပါတယ်။
အခုနှစ် အင်းလေးရေပေါ်သင်္ကြန်ပွဲတော်ကို ညောင်ရွှေမြို့၊ အင်းလေးကန်ရှိ အင်းလေး ရေလယ်ခန်းမမှာ တီးဝိုင်းနဲ့ ဒေသခံ အဆိုတော်တွေ၊ သင်္ကြန်ယိမ်း အကတွေ၊ တိုင်းရင်းသားရိုးရာ အကတွေ၊ မြန်မာ့သနပ်ခါး ယဉ်ကျေးမှု ဓလေ့ကို ဖော်ဆောင်တဲ့ သရုပ်ပြ ဖျော်ဖြေမှုတွေနဲ့အတူ စည်ကားသိုက်မြိုက်စွာ ကျင်းပသွားမှာ ဖြစ်ပါတယ်။ ဒါ့အပြင် အခုနှစ် အင်းလေးရေပေါ်သင်္ကြန် ပွဲတော်ကို အရင်နှစ်တွေနဲ့မတူ အင်းသူ၊ အင်းသားတွေရဲ့ တမူထူးခြား တဲ့ ခြေနဲ့လှေလှော်တဲ့ သရုပ်ပြမှုတွေနဲ့ ထူးထူးခြားခြား ကျင်းပသွားမှာဖြစ်ပါတယ်။အင်းလေးရေပေါ် သင်္ကြန်ပွဲတော်ကို ၂၀၁၉ ခုနှစ်ကနေ စတင်ကျင်းပခဲ့တာဖြစ်ပြီး ၂၀၂၀ ကနေ ၂၀၂၂ ခုနှစ်အထိ ကိုဗစ်-၁၉ ကပ်ရောဂါကြောင့် မကျင်းပနိုင်ခဲ့ဘဲ ၂၀၂၃ မှာ ပြန်လည်ကျင်းပခဲ့တာ ဖြစ်တယ်လို့ သိရပါတယ်။
