ကမ္ဘာ့အင်အားကြီးနိုင်ငံတွေရဲ့ အကူအညီဖြတ်တောက်မှုတွေကြောင့် အနည်းဆုံး နိုင်ငံပေါင်း ၇၀ လောက်က လူတွေဟာ ဆေးဝါးကုသခွင့် ဆုံးရှုံးနေကြတယ်လို့ ကမ္ဘာ့ကျန်းမာရေးအဖွဲ့(WHO) အကြီးအကဲ တီဒရိုက ပြောပါတယ်။ ဆွစ်ဇာလန်နိုင်ငံ ဂျီနီဗာမြို့မှာ မေလ ၁၉ ရက်က ပြုလုပ်ခဲ့တဲ့ ကမ္ဘာ့ကျန်းမာရေး ညီလာခံမိန့်ခွန်းမှာ WHO အကြီးအကဲက အခုလို ထည့်သွင်းပြောခဲ့တာပါ။
အမေရိကန်ပြည်ထောင်စုရဲ့ အထောက်အပံ့မပါဘဲ ကမ္ဘာလုံးဆိုင်ရာ ကျန်းမာရေးအကျပ်အတည်းတွေကို ဘယ်လို ဖြေရှင်းကြမလဲဆိုတာကို ဆွေးနွေးဖို့ ရာနဲ့ချီတဲ့ WHO တာဝန်ရှိသူတွေဟာ ဂျီနီဗာကို ရောက်ရှိနေတာဖြစ်ပြီး အလှူရှင်တွေ၊ သံတမန်တွေနဲ့လည်း ဆွေးနွေးမှုတွေ လုပ်နေပါတယ်။လူနာတွေ ကျန်းမာရေးကုသမှု ခံယူခွင့် ပျောက်ဆုံးနေသလို ကျန်းမာရေးအဆောက်အအုံတွေ ပိတ်ထားရပြီး ကျန်းမာရေးဝန်ထမ်းတွေလည်း အလုပ်လက်မဲ့ ဖြစ်နေကြတယ်လို့ WHO အကြီးအကဲက ပြောပါတယ်။လက်ရှိ WHO ရဲ့ နှစ်စဉ်ဘတ်ဂျက်မှာ အမေရိကန်ဒေါ်လာ သန်း ၆၀၀ လောက် လိုအပ်ချက် ရှိနေတာပါ။
ဒီအတွက် WHO အနေနဲ့ လာမယ့် ၂၀၂၆ နဲ့ ၂၀၂၇ နှစ်နှစ်တာအတွက် ဘတ်ဂျက်ကို အမေရိကန်ဒေါ်လာ ၄ ဒသမ ၂ ဘီလီယံအထိ ပြန်လည်လျှော့ချထားရပြီး WHO အနေနဲ့ တစ်နှစ်ကို ၂ ဒသမ ၁ ဘီလီယံသာ သုံးစွဲနိုင်မှာဖြစ်ပါ တယ်။ ဒေါ်လာ ၂ ဒသမ ၁ ဘီလီယံဟာ ကမ္ဘာလုံးဆိုင်ရာ စစ်အသုံးစရိတ်အနေနဲ့ဆိုရင် ၈ နာရီစာသာ ရှိတယ်လို့ WHO အကြီးအကဲက ဆိုပါတယ်။ ဒါ့ကြောင့် နိုင်ငံတွေအနေနဲ့ စစ်ရေးနဲ့ ကာကွယ်ရေး အသုံးစရိတ်တွေ တိုးမြှင့် နေသလို ကမ္ဘာလုံးဆိုင်ရာ ကျန်းမာရေးအတွက်လည်း အသုံးစရိတ် ပိုထည့်ဝင်သင့်တယ်လို့ သူက တိုက်တွန်း လိုက်ပါတယ်။
