ပြီးခဲ့တဲ့ရက်ပိုင်းက ပြဋ္ဌာန်းလိုက်တဲ့ဘပြည်သူ့စစ်မှုထမ်းနည်းဥပဒေမှာနိုင်ငံတကာနဲ့ မြန်မာနိုင်ငံရဲ့ ပြည်သူ့စစ်မှုထမ်းဥပဒေအကြောင်းအရာတွေကို အခြေခံပညာကျောင်းတွေက သင်ရိုးညွှန်းတမ်းမှာ ဘာသာရပ်တစ်ခုအဖြစ် ထည့်သွင်းပို့ချဖို့ ပြဋ္ဌာန်းထားပါတယ်။
ပြည်သူ့စစ်မှုထမ်းနည်းဥပဒေ ပုဒ်မ၅၉မှာ ကာကွယ်ရေးဝန်ကြီးဌာနဟာ နိုင်ငံတကာပြည်သူ့စစ်မှုထမ်းဥပဒေနဲ့ မြန်မာနိုင်ငံရဲ့ ပြည်သူ့စစ်မှုထမ်းဥပဒေဆိုင်ရာ အကြောင်းအရာတွေနဲ့ပတ်သက်ပြီး ပြည်သူလူထုထံ ကျယ်ကျယ်ပြန့်ပြန့်သိရှိနိုင်ဖို့ အခြေခံပညာကျောင်းတွေကအစပြုပြီး သင်ရိုးညွှန်းတမ်းမှာ ညာသာရပ်တစ်ခုအနေနဲ့ ထည့်သွင်းပို့ချနိုင်ဖို့ သက်ဆိုင်ရာဝန်ကြီးဌာနတွေနဲ့ ပေါင်းစပ်ညှိနှိုင်းရမယ်လို့ ပြဋ္ဌာန်းထားတာပါ။
နည်းဥပဒေပုဒ်မ၅၀မှာ ဆေးစစ်အောင်မြင်ပြီးသူတွေဟာ ပြည်သူ့စစ်မှုထမ်းခြင်းကနေ ကင်းလွတ်ခွင့်ပြုဖို့ဖြစ်စေ၊ ပြည်သူ့စစ်မှုထမ်းရမယ့် ကာလအပိုင်းအခြားကို လျှော့ပေါ့ဖို့ဖြစ်စေ၊ သီးခြားဖော်ပြထားတဲ့ ကာလအပိုင်းအခြားတစ်ခုအထိ ရွှေ့ဆိုင်းဖို့ဖြစ်စေ လျှောက်ထားခဲ့ရင် အဲ့ဒီလျှောက်ထားမှုအပေါ် ဗဟိုအဖွဲ့ကနေ ခွင့်ပြုမိန့်မရမီ ပြည်ပနိုင်ငံတွေကို ထွက်ခွာခွင့်မရှိစေရလို့ ပြဋ္ဌာန်းထားပါတယ်။ဒါ့အပြင် နည်းဥပဒေပုဒ်မ ၅၁မှာလည်း ပြည်သူ့စစ်မှုထမ်းဖို့ဆင့်ခေါ်တဲ့ အမိန့်စာရရှိသူဟာ ဗဟိုအဖွဲ့ရဲ့ခွင့်ပြုချက်မရှိဘဲ ပြည်ပနိုင်ငံတွေကို ထွက်ခွာခွင့်မရှိစေရလို့ ပြဋ္ဌာန်းထားပါတယ်။
၂၀၁၀ပြည့်နှစ်မှာ ပြဋ္ဌာန်းခဲ့တဲ့ပြည်သူ့စစ်မှုထမ်းဥပဒေကို ၂၀၂၄ခုနှစ်၊ ဖေဖော်ဝါရီ ၁၀ရက်ကစပြီး စတင်အာဏာတည်စေရမယ်လို့ နိုင်ငံတော်စီမံအုပ်ချုပ်ရေးကောင်စီက အမိန့်ထုတ်ပြန်ခဲ့တာဖြစ်ပါတယ်။ပြည်သူ့စစ်မှုထမ်းသင်တန်းအမှတ်စဉ်၁ကို ၂၀၂၄ခုနှစ်၊ ဧပြီ၁ရက်က စတင်ဖွင့်လှစ်ခဲ့ပြီး လက်ရှိမှာ သင်တန်းအမှတ်စဉ်၉အထိ ဖွင့်လှစ်ထားပြီးဖြစ်ပါတယ်။
ဓာတ်ပုံ-MOI
