၇၇ကြိမ်မြောက် တိပိဋကဓရ တိပိဋကကောဝိဒရွေးချယ်ရေးစာမေးပွဲ(သဘောရေးဖြေ)ပွဲကို ဇန်နဝါရီ၁၈ရက် မွန်းလွဲပိုင်းက ရန်ကုန်မြို့၊ သီရိမင်္ဂလာကမ္ဘာအေးကုန်းမြေရှိ ဆဋ္ဌသင်္ဂါယနာမဟာပါသာဏလိုဏ်ဂူသိမ်တော်ကြီးမှာ ကျင်းပခဲ့ပြီး သံဃာစုစုပေါင်း၁၆၇ပါး ဝင်ရောက်ဖြေဆိုခဲ့တယ်လို့ သာသနာရေးဦးစီးဌာနကနေ သိရပါတယ်။
တိပိဋကဓရ တိပိဋကကောဝိဒရွေးချယ်ရေးစာမေးပွဲ(သဘောရေးဖြေ)ပွဲရဲ့ အဘိဓမ္မာ(ဒုတိယပိုင်း)မှာ သံဃာတော်၄ပါး၊ အဘိဓမ္မာ(ပထမပိုင်း)မှာ သံဃာတော်၁၅ပါး၊ ဒိဃနိကာယ်ကျမ်းမှာ သံဃာတော်၃၅ပါး၊ ဝိနည်း(ပထမပိုင်း)မှာ သံဃာတော် ၁၁၃ပါး ဝင်ရောက်ဖြေဆိုတာဖြစ်တယ်လို့ ဆိုပါတယ်။(၇၇)ကြိမ်မြောက် တိပိဋကဓရ တိပိဋကကောဝိဒ ရွေးချယ်ရေးစာမေးပွဲကို ၂၀၂၄ခုနှစ် ဒီဇင်ဘာ၂၄ရက်ကနေ ၂၀၂၅ခုနှစ် ဇန်နဝါရီ၂၅ရက်အထိ ၃၃ရက်ကြာ ကျင်းပနေတာဖြစ်ပါတယ်။
တိပိဋကဓရ တိပိဋကကောဝိဒရွေးချယ်ရေးစာမေးပွဲကြီးကို ဝင်ရောက်ဖြေဆိုကြမယ့် ရဟန်းသံဃာတွေဟာအနည်းဆုံးပထမကြီး၊ ဝိနယဝိဒူ၊ သာမဏေကျော်(တတိယဆင့်) အောင်မြင်ပြီးတဲ့ ရဟန်းသံဃာဖြစ်ရမှာဖြစ်ပါတယ်။
သင်ရိုးပိဋက သုံးပုံပါဠိတော်ကျမ်းစာအုပ်တွေကတော့ ဝိနယပိဋကကျမ်းစာအုပ်ငါးအုပ်၊ စာမျက်နှာပေါင်း ၂၂၆၀၊ သုတ္တန္တပိဋက၊ ကျမ်းစာအုပ် သုံးအုပ်စာမျက်နှာပေါင်း ၇၇၉ မျက်နှာ၊ အဘိဓမ္မပိဋက ကျမ်းစာအုပ် ၁၂ အုပ်၊ စာမျက်နှာပေါင်း ၄၉၈၇ မျက်နှာ၊ စုစုပေါင်းကျမ်းစာအုပ် ၂၀ ၊ စာမျက်နှာပေါင်း ၈၀၂၆ မျက်နှာဖြစ်ပြီး အာဂုံပြန်ဆို အောင်မြင်တော်မူရင် “တိပိဋကဓရဘွဲ့”ကို ဆက်ကပ်တာဖြစ်သလို အဲ့ဒီကျမ်းစာအုပ် ၂၀နဲ့ အဖွင့်ကျမ်းတွေဖြစ်တဲ့ အဋ္ဌကထာ၊ ဋီကာ၊ အနုဋီကာ၊ ယောဇနာ၊ ဂဏ္ဌိ၊ အနုဂဏ္ဌိ စတဲ့ကျမ်းစာအုပ်တွေက အဓိပ္ပာယ်အရကောက်တွေကို သဘောရေးဖြေအောင်မြင်တော်မူရင် တိပိဋကဓရတိပိဋကကောဝိဒဘွဲ့ကို ဆက်ကပ်လှူဒါန်းတာဖြစ်တယ်လို့ သိရပါတယ်။
အာဂုံပြန်ဆိုချိန်မှာ တစ်ရက်ကို မနက်ပိုင်း ၈ နာရီကနေ ၁၀ နာရီအထိ လေးကြိမ်၊ မွန်းလွဲပိုင်း ၁ နာရီကနေ ၄ နာရီအထိ ငါးကြိမ်စုစုပေါင်း ကိုးကြိမ်နှုန်းနဲ့ ၁၈ ရက်တိတိ ပြန်ဆိုရပြီး သဘောရေးဖြေစာမေးပွဲကို မွန်းလွဲ ၁၂ နာရီခွဲကနေ ညနေ ၄ နာရီခွဲအထိ ငါးရက်ဖြေဆိုရကာ အာဂုံပြန်ဆိုရာမှာ အထစ်အငေါ့မရှိ ထူးကဲစွာ ပြန်ဆိုနိုင်ရင် ဝိသိဋ္ဌဝိနယဓရ၊ ဝိသိဋ္ဌဒီဃဘာဏကနဲ့ ဝိသိဋ္ဌအာဘိဓမ္မိကဘွဲ့၊ သဘောရေးဖြေမှာ သတ်မှတ်အောင်မှတ်နဲ့ အထက်ရရှိရင် မဟာဝိနယကောဝိဒ၊ မဟာဒီဃနိကာယကောဝိဒနဲ့ မဟာအဘိဓမ္မကောဝိဒဘွဲ့တို့ကို ဆက်ကပ်တာဖြစ်ပါတယ်။
တိပိဋကဓရတိပိဋကကောဝိဒဘွဲ့ကို ခံယူရရှိတော်မူပြီး အနည်းဆုံးငါးနှစ်သက်တမ်းပြည့်မြောက်ရင် “တိပိဋကဓရ ဓမ္မဘဏ္ဍာဂါရိက” ဘွဲ့တံဆိပ်တော်ကို ဆက်ကပ်တာဖြစ်တယ်လို့ သာသနာရေးဦးစီးဌာနကနေ သိရပါတယ်။
ပြီးခဲ့တဲ့ (၇၆)ကြိမ်မြောက် စာမေးပွဲအပြီးအထိ တိပိဋကဓရ တိပိဋကကောဝိဒ သာသနာ့အာဇာနည် ဆရာတော်၁၆ပါး ပေါ်ထွန်းခဲ့ပြီးပထမဆုံးပေါ်ထွန်းတော်မူခဲ့တဲ့ တိပိဋကဓရ တိပိဋကကောဝိဒဆရာတော်ကတော့ မင်းကွန်းဆရာတော်ဘုရားကြီးဖြစ်တယ်လို့ သိရပါတယ်။
ဓာတ်ပုံ-သာသနာရေးဦးစီးဌာန
