အမေရိကန်သမ္မတ ဒေါ်နယ်ထရမ့်ဟာ သူမဲဆွယ်စဉ်က ပေးထားတဲ့ ကတိကဝတ်အတိုင်း ပညာရေးဝန်ကြီးဌာနကို ပိတ်သိမ်းမယ်ဆိုတဲ့အမိန့်ကို အကောင်အထည်ဖော်တော့မှာဖြစ်ကြောင်း အိမ်ဖြူတော်မှာ ပြောကြားလာတာကို Reuters သတင်းမှာ ဖော်ပြပါတယ်။
ဒီအမိန့်ကို လက်မှတ်မထိုးခင်ကတည်းက ဒီမိုကရက်တွေ အာဏာရထားတဲ့ ပြည်နယ်တွေက ပြည်နယ်ရှေ့နေချုပ်တွေ စုပေါင်းပြီး ကြိုတင်ကန့်ကွက်ထားကြပါတယ်။ ဦးဆောင် အရပ်ဘက် အခွင့်အရေး အဖွဲ့အစည်းတစ်ခုဖြစ်တဲ့ (NAACP)ကလည်း ဒီအမိန့်ဟာ အခြေခံဥပဒေနဲ့ မညီဘူးလို့ ဝေဖန်ခဲ့ပါ တယ်။ထရမ့်ရဲ့ လုပ်ဆောင်ချက်နဲ့ပတ်သက်ပြီး NAACP ဥက္ကဋ္ဌ ဒါးရစ် ဂျွန်ဆင်က “ထရမ့်ကို မဲပေးခဲ့တဲ့ မိဘတွေရှိတဲ့ ဆင်းရဲသား အသိုက်အဝန်းတွေ၊ ကျေးလက်အသိုက်အဝန်းတွေ အပါအဝင် အရည်သွေးပြည့်မီတဲ့ ပညာရေး အတွက် ပြည်ထောင်စုရန်ပုံငွေကို မှီခိုနေရတဲ့ အမေရိကန် ကလေးငယ် သန်းပေါင်းများစွာအတွက် မှောင်မိုက်တဲ့ နေ့တစ်နေ့ ဖြစ်ပါတယ် လို့ ထုတ်ပြန်ထားပါတယ်။
ထရမ့်နဲ့ အစိုးရအကျိုးထိရောက်မှုဌာန အကြီးအကဲ အီလွန်မတ်စ်ခ်တို့ဟာ လွှတ်တော်အတည်ပြုချက် မယူဘဲ အမေရိကန်ရဲ့ အပြည်ပြည်ဆိုင်ရာ ဖွံ့ဖြိုးရေးအေဂျင်စီ (USAID)လို အဖွဲ့အစည်းတွေနဲ့ ပရိုဂရမ်အများအပြားကို ပိတ်သိမ်းဖို့ စီစဉ်နေတာဖြစ်ပါတယ်။ဒါပေမဲ့ ကက်ဘိနက်အဆင့် ဝန်ကြီးဌာန တစ်ခုကို ပိတ်သိမ်းဖို့မှာတော့ ပညာရေးဌာနဟာ ပထမဆုံး ပစ်မှတ် ထားခံရတာ ဖြစ်ပါတယ်။ လွှတ်တော်က ဥပဒေအတည်ပြုမပေးဘဲနဲ့ ပညာရေးဝန်ကြီးဌာနကို အပြီးတိုင် ပိတ်သိမ်းလို့ မရတဲ့အတွက် ခက်ခဲမှုတော့ ရှိနိုင်တယ်လို့ သိရပါတယ်။
