တက္ကသိုလ်ဝင်တန်းစာမေးပွဲကို ပြန်လည်ဖြေဆိုကြမဲ့ စစ်ကိုင်းမြို့က ကျောင်းသား၊ ကျောင်းသူတွေကို စခန်းသွင်းသင်ကြားပေးတဲ့ကာလအတွင်း စိတ်အေးချမ်းသာစွာ သင်ကြားနိုင်ဖို့အတွက် နေထိုင်၊ စားသောက် ရေးတွေကို ပြည့်စုံအောင် စီမံပေးထားပြီးဖြစ်တယ်လို့ စစ်ကိုင်းခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးမျိုးအောင်က ပြောပါတယ်။
ဧပြီ ၂၉ ရက်၊ ညနေပိုင်းက စစ်ကိုင်းမြို့၊ အမှတ်(၁)အခြေခံပညာအထက်တန်းကျောင်းမှာ ပြုလုပ်တဲ့ စာမေးပွဲ ပြန်လည်ဖြေဆိုမဲ့ ကျောင်းသား၊ ကျောင်းသူတွေ၊ သင်ကြားပေးမဲ့ ဆရာ၊ ဆရာမတွေ၊ ကျောင်းသားမိဘတွေနဲ့ တွေ့ဆုံပွဲမှာ အခုလို ပြောကြားလိုက်တာပါ။ဆရာ၊ ဆရာမတွေနဲ့ ကျောင်းသား၊ ကျောင်းသူတွေ စခန်းသွင်းသင်ကြားနေစဉ်ကာလအတွင်း သောက်သုံးရေ၊ လျှပ်စစ်မီး၊ ကျန်းမာရေးစောင့်ရှောက်မှု၊ စာသင်ဆောင်၊ စားသောက်ဆောင်၊ အိပ်ဆောင်တွေ သန့်ရှင်းသပ်ရပ်မှု ရှိစေဖို့နဲ့ လုံခြုံအေးချမ်းစွာ သင်ကြားနိုင်ဖို့ စတာတွေကို အလေးထားဆောင်ရွက်ထားပြီးဖြစ်တယ်လို့ သိရပါတယ်။
သင်ကြားပေးမဲ့ ဆရာ၊ ဆရာမတွေအနေနဲ့လည်း သင်ကြားရေးလုပ်ငန်းတွေကို စေတနာအပြည့်အဝနဲ့ သင်ကြား ပေးစေလိုတယ်လို့ ဆိုပါတယ်။မတ်လ ၂၈ ရက်က လှုပ်ခတ်ခဲ့တဲ့ မန္တလေးငလျင်ကြီးဒဏ်ကြောင့် မန္တလေးတက္ကသိုလ် မီးလောင်မှုဖြစ်ပွားခဲ့ရာမှာ မန္တလေးတက္ကသိုလ်ပင်မဆောင်ကို ရောက်ရှိနေတဲ့ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ကချင် ပြည်နယ်တွေက ဖြေဆိုသူဦးရေ ၆၂၉၅၄ ယောက်ရဲ့ တက္ကသိုလ်ဝင်စာမေးပွဲ အဖြေလွှာအုပ်ရေ ၃၇၆၉၅၆ အုပ် မီးလောင်ပျက်စီးဆုံးရှုံးခဲ့ရတဲ့အတွက် အဲဒီဖြေဆိုသူတွေအနေနဲ့ ဇွန်လ ၁၆ ရက်ကနေ ၂၁ ရက်အထိ တက္ကသိုလ် ဝင်စာမေးပွဲကို ပြန်လည်ဖြေဆိုရမှာ ဖြစ်ပါတယ်။
