အခု ၂၀၂၅ – ၂၀၂၆ ဘဏ္ဍာနှစ် ပထမသုံးလပတ်အတွင်း ပင်လယ်ရေကြောင်းကနေ ပြည်ပကို ပဲမျိုးစုံတန်ချိန် ၄၄၃,၀၀၀ တင်ပို့ထားတယ်လို့ မြန်မာနိုင်ငံ ပဲမျိုးစုံ၊ ပြောင်းနှင့်နှမ်းကုန်သည်များအသင်းက သိရပါတယ်။အခုဘဏ္ဍာနှစ် ဧပြီလကနေ ဇွန်လအတွင်း ပြည်ပကို ပဲမျိုးစုံတင်ပို့မှုကနေ ပို့ကုန်တန်ဖိုး အမေရိကန်ဒေါ်လာ သန်း ၃၆၀ နီးပါး ရှိတယ်လို့ မြန်မာနိုင်ငံ ပဲမျိုးစုံ၊ ပြောင်း နှင့် နှမ်းကုန်သည်များအသင်း အကြံပေးပုဂ္ဂိုလ် ဦးစိုးဝင်းမောင် က ပြောပါတယ်။
ဒီဘဏ္ဍာနှစ်ထဲမှာ ပြည်ပကို ပဲမျိုးစုံတန်ချိန် ၁ ဒသမ ၈၃ သန်း တင်ပို့နိုင်ဖို့ လျာထားပြီး ပို့ကုန်ဝင်ငွေ အမေရိကန် ဒေါ်လာ ၁ ဒသမ ၄၈ ဘီလီယံဖိုး ရရှိဖို့ လျာထားတယ်လို့ ဆိုပါတယ်။ ပြည်ပကို နိုင်ငံတကာဈေးကွက်ဝင် ပဲမျိုးစုံ တင်ပို့ရာမှာ ဈေးကွက်အသစ်ထက် လက်ရှိတင်ပို့နေတဲ့ ဈေးကွက်တွေကို ပိုမိုတိုးချဲ့နိုင်ဖို့ ကြိုးပမ်းဆောင်ရွက်နေ တယ်လို့ သိရပါတယ်။ ပြည်ပကို ပဲမျိုးစုံတင်ပို့ရာမှာ ပင်လယ်ရေကြောင်းက အဓိက တင်ပို့နေတာပါ။
ပြီးခဲ့တဲ့ ၂၀၂၄-၂၀၂၅ ဘဏ္ဍာနှစ်က ပြည်ပကို ပဲမျိုးစုံတန်ချိန် ၂ ဒသမ ၁၄ သန်း တင်ပို့နိုင် ခဲ့ပြီး ပို့ကုန်ဝင်ငွေ အမေရိကန်ဒေါ်လာ ၁ ဒသမ ၈၂ ဘီလီယံ ရရှိခဲ့ပါတယ်။ မြန်မာနိုင်ငံကနေ ပဲမျိုးစုံကို အိန္ဒိယနိုင်ငံကို အများဆုံး တင်ပို့နေတာဖြစ်ပြီး တရုတ်နဲ့ ဥရောပသမဂ္ဂနိုင်ငံတွေကိုလည်း တင်ပို့နေပါတယ်။ ပြည်ပကို မတ်ပဲ၊ ပဲတီစိမ်း၊ ပဲစင်းငုံ၊ ပဲယဉ်း၊ ထောပတ်ပဲ စတဲ့ ပဲအမျိုးအစားပေါင်း ၂၀ လောက် တင်ပို့နေတယ်လို့ သိရပါတယ်။
