ရန်ကုန်တိုင်းဒေသကြီး၊ ဒဂုံမြို့သစ်ဆိပ်ကမ်းမြို့နယ်မှာရှိတဲ့ ရိုးမရိပ်သာတန်ဖိုးနည်းအိမ်ရာက တိုက်ခန်းဝယ်ယူဖို့ အတွက် လျှောက်လွှာ ၃ သောင်းကျော်ရောင်းချခဲ့ရပြီး အဲဒီအထဲက လျှောက်လွှာပြန်တင်သူ ၂ သောင်း ၈ ထောင် ကျော် ရှိခဲ့တယ်လို့ မြို့ပြနှင့်အိမ်ရာဖွံ့ဖြိုးရေးဦးစီးဌာနကနေ သိရပါတယ်။ ဆောက်လုပ်ရေးဝန်ကြီးဌာန မြို့ပြနှင့် အိမ်ရာဖွံ့ဖြိုးရေးဦးစီးဌာနက အကောင်အထည်ဖော် ဆောင်ရွက်ခဲ့တဲ့ ရိုးမရိပ်သာတန်ဖိုးနည်းအိမ်ရာက အခန်း ၈၇၄ ခန်းကို ရောင်းချသွားမှာပါ။
အဲဒီအခန်းကို ရန်ကုန်တိုင်းဒေသကြီးအစိုးရအဖွဲ့ရဲ့ ကြီးကြပ်မှုနဲ့ ဝင်ငွေနည်းပြီး နေရေးအခက်အခဲရှိတဲ့ ပြည်သူတွေ၊ အငြိမ်းစားဝန်ထမ်းတွေနဲ့ တာဝန်ထမ်းဆောင်ဆဲဝန်ထမ်းငယ်တွေကို ရောင်း ချသွားမှာ ဖြစ်ပါတယ်။ လျှောက်လွှာတွေကိုတော့ အိမ်ရာရောင်းချရေး ကော်မတီက စိစစ်ပြီး သတ်မှတ်ချက်နဲ့ ကိုက်ညီတဲ့ လျှောက်လွှာတွေကို မဲစနစ်နဲ့ရွေးချယ်သွားမှာဖြစ်တယ်လို့ ဆိုပါတယ်။ရန်ကုန်မှာ အိမ်ငှားနဲ့ နေထိုင်သူ များပြားပြီး လက်ရှိမှာလည်း ရန်ကုန်ကို ပြောင်းရွှေ့နေထိုင်သူတွေ များလာတာ ကြောင့် တိုက်ခန်းအငှားဈေးကွက်ကလည်း မြင့်တက်လာနေပါတယ်။ ဒါကြောင့် ဝင်ငွေနည်းပြည်သူတွေ နေရေး အဆင်ပြေဖို့အတွက် သက်ဆိုင်ရာတာဝန်ရှိအဖွဲ့အစည်းတွေအနေနဲ့ အငှားအိမ်ရာစီမံကိန်းတွေ များများ ဖော်ဆောင် ပေးစေချင်တယ်လို့ အိမ်ငှားနေထိုင်သူတစ်ယောက်က ပြောပါတယ်။
ဆောက်လုပ်ရေးဝန်ကြီးဌာန မြို့ပြနဲ့အိမ်ရာဖွံ့ဖြိုးရေးဦးစီးဌာနက တန်ဖိုးနည်း၊ တန်ဖိုးသင့် အိမ်ရာစီမံကိန်းတွေနဲ့ အငှားအိမ်ရာစီမံကိန်းတွေကို ဖော်ဆောင်ပေးနေပါတယ်။ရန်ကုန်တိုင်းဒေသကြီး လှိုင်သာယာ၊ ရွှေပြည်သာ၊ ဒဂုံမြို့သစ်(ဆိပ်ကမ်း)နဲ့ သန်လျင်-ကျောက်တန်းမြို့နယ်တွေ မှာ တန်ဖိုးနည်းအိမ်ရာစီမံကိန်းတွေကို တည်ဆောက်ရောင်းချပေးနေတယ်လို့ သိရပါတယ်။အဲဒီအိမ်ရာတွေမှာရှိတဲ့ အိမ်ခန်းတွေကို ဝယ်ယူချင်တဲ့သူတွေအနေနဲ့ အိမ်ရာနှင့်အခြေခံအဆောက်အအုံဖွံ့ဖြိုးရေး ဘဏ်မှာ အိမ်ရာစုဆောင်းငွေစာရင်းဖွင့်လှစ်ပြီး စုဆောင်းငွေကျပ်သိန်း ၃၀ ပြည့်ရင် နှစ်ရှည်အိမ်ရာချေးငွေယူကာ အိမ်ခန်းဝယ်ယူခွင့် ရရှိမှာဖြစ်တယ်လို့ သိရပါတယ်။
