အွန်လိုင်းစနစ်နဲ့ရောင်းချနေတဲ့ ရွှေဆိုင်တွေအနေနဲ့ ဓာတ်သတ္တု(ရွှေ) ရောင်းဝယ်တဲ့ဝန်ဆောင်မှုလုပ်ငန်း လိုင်စင်အပြင် ကုန်သွယ်ရေးဦးစီးဌာနမှာ အွန်လိုင်းရောင်းဝယ်ရေးလိုင်စင် ထပ်မံလျှောက်ထားရမယ်လို့ ရန်ကုန်တိုင်းဒေသကြီးရွှေလုပ်ငန်းရှင်များအသင်း ဥက္ကဋ္ဌ ဦးမျိုးမြင့်က ပြောပါတယ်။
အွန်လိုင်းစနစ်နဲ့ မရောင်းတဲ့ ရွှေဆိုင်တွေကတော့ အဲဒီလိုင်စင်ကို ထပ်မံ လျှောက်ထားစရာမလိုဘူးလို့ ဦးမျိုးမြင့်က ပြောပါတယ်။စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက အွန်လိုင်းစနစ်နဲ့ ရောင်းချတဲ့လုပ်ငန်းတွေကို ၂၀၂၄ ခုနှစ် အောက်တိုဘာ ၂ ရက်ကစလို့ မှတ်ပုံတင်လျှောက်ထားခွင့် ပြုထားတာပါ။ မှတ်ပုံတင်လက်မှတ်မရှိဘဲ အွန်လိုင်း စနစ်နဲ့ ရောင်းချတဲ့လုပ်ငန်း ဆောင်ရွက်ရင် အရေးကြီးကုန်စည်နဲ့ ဝန်ဆောင်မှုဥပဒေ ပုဒ်မ ၅ အရ အရေးယူခံရ မယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက သိရပါတယ်။
လက်ရှိ ရွှေဈေးကွက်ထဲမှာ ဈေးနှုန်းက အမြင့်ပိုင်းမှာရှိတဲ့အတွက် အဝယ်ထက် အရောင်းကပိုများ နေတယ်လို့ သိရပါတယ်။ဓာတ်သတ္တု (ရွှေ)ရောင်းဝယ်တဲ့ဝန်ဆောင်မှုလုပ်ငန်းလုပ်ကိုင်နေတဲ့ ဆိုင်တွေအနေနဲ့လည်း လိုင်စင် လျှောက်ထားရမှာဖြစ်ပါတယ်။ ပြီးခဲ့တဲ့ ၂၀၂၄ ခုနှစ် နိုဝင်ဘာလ ၁၈ ရက်ကနေ ၂၀၂၅ခုနှစ် ဖေဖော်ဝါရီလ ၁၇ ရက်နေ့အထိ ၃လအတွင်း ဓာတ်သတ္တု(ရွှေ) ရောင်းဝယ်တဲ့ဝန်ဆောင်မှုလုပ်ငန်းလိုင်စင်လျှောက်ထားမှု စုစုပေါင်း ၄၇၅၈ စောင်ရှိတယ်လို့ သိရပါတယ်။
