ဒလမြို့နယ်အတွင်းက အိမ်ခြံမြေဈေးကွက်အခြေအနေဟာ လက်ရှိမှာတော့ အဝယ်များနေပြီး အရောင်းနည်းနေ သလို တချို့ဆို အရောင်းပိတ်ထားကြတယ်လို့ ဒလမြို့နယ်က အိမ်ခြံမြေအကျိုးဆောင်လုပ်ငန်း လုပ်ကိုင်သူတွေ ဆီကနေ သိရပါတယ်။
လက်ရှိမှာတော့ မြေကွက်ကို အဝယ်များပြီး ဒလနဲ့ ကော့မှူး လမ်းမပေါ်မှာ အရောင်းအဝယ် ပိုဖြစ်နေတယ်လို့ ရှမ်းလေးအိမ်ခြံမြေအကျိုးဆောင်ရဲ့ တာဝန်ရှိသူတစ်ယောက်က ပြောပါတယ်။ ဒလမြို့နယ်မှာ ပါမစ်၊ ဂရန်ပါတဲ့ ပေ ၂၀၊ ပေ ၆၀ မြေကွက်ကို ငွေကျပ် သိန်း ၁၅၀၀ ကနေ သိန်း ၇၅၀၀ ဝန်းကျင် လောက်အထိ ရှိပြီး ပေ ၄၀၊ ပေ ၆၀ မြေကွက်ကတော့ သိန်း ၄၀၀၀ ကနေ သိန်း ၂၀၀၀၀ လောက်အထိ ပေါက်ဈေးရှိတယ်လို့ ဆိုပါတယ်။ဒလတံတား စီမံကိန်း ပြီးစီးခါနီးပြီဖြစ်တာကြောင့်လည်း ဒလမြို့နယ်မှာ အိမ်ခြံမြေတွေ အဝယ်လိုက်နေကြ တာဖြစ်တယ်လို့ အိမ်ခြံမြေအကျိုးဆောင်တချို့က သုံးသပ်ကြပါတယ်။
တံတားတည်ဆောက်ပြီးစီးသွားရင်လည်း ဒလ အိမ်ခြံမြေဈေးတွေက လက်ရှိဈေးထက် သိသိသာသာ မြင့်တက် သွားတာမျိုးတော့ မဖြစ်နိုင်ဘူးလို့ မြန်မာနိုင်ငံအိမ်ခြံမြေဝန်ဆောင်မှုအသင်း(ဗဟို)ရဲ့အထွေထွေအတွင်းရေးမှူး ဦး မျိုးမြင့်အောင်က ပြောပါတယ်။ ဒလမြစ်ကူးတံတားကို ကိုရီးယားနိုင်ငံ စီးပွားဖွံ့ဖြိုးမှု ရန်ပုံငွေချေးငွေနဲ့ အစိုးရထည့်ဝင်ငွေ အပါအဝင် စုစုပေါင်း အမေရိကန်ဒေါ်လာ ၁၈၈ သန်းကျော်လောက် အကုန်ကျခံတည်ဆောက်နေတာဖြစ်ပြီး စီမံကိန်းလုပ်ငန်းတွေ အားလုံး ဒီဇင်ဘာလအတွင်း ပြီးစီးနိုင်ဖို့ ရည်မှန်းဆောင်ရွက်နေတယ်လို့ သိရပါတယ်။
