ဂီတတူရိယာပစ္စည်းတွေဟာ ဈေးကွက်အတွင်းမှာ ရောင်းအား ကျဆင်းနေပြီး ဈေးကလည်း သိသိသာသာ မြင့်တက်လာတယ်လို့ တူရိယာပစ္စည်း အရောင်းဆိုင်တွေကနေ သိရပါတယ်။
အရင်နှစ်တွေက အခုလို သင်္ကြန် ကာလ နီးကပ်လာရင် ရောင်းအားကောင်းလေ့ရှိခဲ့ပေမယ့် လက်ရှိမှာတော့ လွန်ခဲ့တဲ့ ငါးနှစ်တာကာလနဲ့ နှိုင်းယှဉ် ရင် ရောင်းအားက (၅၀)ရာခိုင်နှုန်းလောက်အထိ ကျဆင်းနေပြီး ဈေးကလည်း နှစ်ဆခွဲ (၃)ဆလောက်အထိ မြင့်တက်လာတယ်လို့ ရန်ကုန်မြို့၊ ပန်းပဲတန်းမြို့နယ်ရှိ (30)တူရိယာအရောင်းဆိုင်ရဲ့ ပိုင်ရှင် ကိုထွန်းထွန်းလင်း က ပြောပါတယ်။
ဂီတတူရိယာပစ္စည်းတွေထဲမှာ အသစ်တွေကို ဝယ်ယူတာထက် အဟောင်းတွေကို ဝယ်ယူတာ ပိုများလာတယ်လို့ ကိုထွန်းထွန်းလင်းက ပြောပါတယ်။တူရိယာပစ္စည်းတွေဖြစ်တဲ့ ကီးဘုတ်၊ ဂစ်တာ၊ တယော အစရှိတာတွေထဲက ကီးဘုတ်တွေကို ဝယ်ယူသူ များပြီး အဟောင်းတွေထဲက ကျပ်(၁)သိန်း ကနေ(၃)သိန်းဝန်းကျင်လောက် ဈေးရှိတာတွေနဲ့ အသစ်ထဲက ကျပ်(၁၀) သိန်းလောက်ရှိတာတွေက ပိုရောင်းနေရတယ်လို့ ဆိုပါတယ်။လတ်တလောမှာ နွေရာသီကျောင်းပိတ်ရက်ဖြစ်လို့ သားသမီးတွေကို ဖုန်းပေးသုံးတာတွေအစား တူရိယာပစ္စည်း လေးတွေ အစားထိုးသုံးစွဲစေဖို့ လာရောက်ဝယ်ယူကြတာက ပိုများနေတယ်လို့ သိရပါတယ်။
