KBZ Pay အကောင့်ကို ပြည်ပဖုန်းနံပါတ်တွေနဲ့ အသုံးပြုလို့ ရတော့မှာ မဟုတ်ဘူးလို့ KBZ Pay က အသိပေး အကြောင်းကြားထားပါတယ်။ထိုင်းဖုန်းနဲ့ ဖွင့်လှစ်အသုံးပြုနေတဲ့ KBZ Pay အကောင့်တွေကိုလည်း မတ်လ ၁၉ ရက်ကစပြီး ငွေလွှဲ ဝန်ဆောင်မှုတွေကို ယာယီဆိုင်းငံ့ထားမှာ ဖြစ်ပြီး KBZ Pay အကောင့်ကို ဆက်လက်အသုံးပြုနိုင်ဖို့ အတွက် မြန်မာဖုန်းနံပါတ်နဲ့ ပြောင်းလဲ အသုံးပြုဖို့ လိုအပ်တယ်လို့ ဆိုပါတယ်။
လက်ရှိ မူဝါဒ ပြောင်းလဲမှုတွေအရ KBZ Pay အကောင့်ကို ပြည်တွင်းဖုန်းနံပါတ်နဲ့သာ အသုံးပြုနိုင် တော့မှာ ဖြစ်တဲ့အတွက် KBZ Pay အသုံးပြုသူတွေအနေနဲ့လည်း ပြည်ပဖုန်းနံပါတ်ကို ပြည်တွင်းဖုန်း နံပါတ် တစ်ခုခုနဲ့ ပြောင်းလဲ အသုံးပြုဖို့ လိုအပ်တယ်လို့လည်း KBZ Pay က တာဝန်ရှိသူတစ်ယောက်က ပြောပါတယ်။မြန်မာ ဖုန်းနံပါတ်ပြောင်းလဲဖို့ KBZ Pay အပလီကေးရှင်းထဲရှိ ဖုန်းနံပါတ်ပြောင်း Function မှာ လုပ်ဆောင်ရမယ့် အဆင့်တစ်ခုချင်းစီကို လိုက်နာပြီး လွယ်ကူစွာ ပြောင်းလဲနိုင်မှာ ဖြစ်ပြီး ဖုန်းနံပါတ် ပြောင်းလဲနိုင်ဖို့ KBZ Pay App ကို မကြာမီရက်ပိုင်း ထွက်ရှိလာမယ့် ဗားရှင်းအသစ်ကို အဆင့်မြှင့်တင် ထားဖို့ လိုအပ်တယ်လို့ ဆိုပါတယ်။
ဗားရှင်းအသစ် မထွက်သေးခင်ကာလအတွင်း ဖုန်းနံပါတ်ကို အမြန်ပြောင်းလဲတပ်ဆင်လိုရင်တော့ Virtual Customer Support နဲ့ ဘွတ်ကင်ပြုလုပ်ပြီး ဝန်ဆောင်မှု ရယူနိုင်တယ်လို့လည်း KBZ Pay က အသိပေး အကြောင်းကြားထားပါတယ်။
