တရားဝင်လိုင်စင်မရှိဘဲ နိုင်ငံခြားငွေကြေးတွေ ဝယ်ယူ၊ ရောင်းချ၊ လဲလှယ်တာကို ရည်ရွယ်ချက်ရှိရှိနဲ့ ဆောင်ရွက် နေတဲ့ လူပုဂ္ဂိုလ်၊ အဖွဲ့အစည်းတွေကို ထိထိရောက်ရောက် အရေးယူဆောင်ရွက်နိုင်ရေး အရှိန်မြှင့် ဆောင်ရွက် သွားမယ်လို့ မြန်မာနိုင်ငံတော် ဗဟိုဘဏ်က ဇွန်လ ၁၂ ရက်မှာ ထုတ်ပြန်ပါတယ်။
USDT အပါအဝင် နိုင်ငံခြားငွေ ကမောက်ကမဖြစ်စေဖို့ ရည်ရွယ်ပြီး Online ပေါ်မှာ ဈေးကစားတာ၊ မမှန်ကန်တဲ့ သတင်းတွေ ဖြန့်ဝေတာတွေ ဆောင်ရွက်နေတဲ့ လူပုဂ္ဂိုလ်တွေကို နိုင်ငံခြားသုံးငွေ စီမံခန့်ခွဲမှုဥပဒေ၊ ငွေကြေးခဝါချ မှု တိုက်ဖျက်ရေး ဥပဒေ၊ ငွေရေးကြေးရေး အဖွဲ့အစည်းများ ဥပဒေ၊ ဆက်သွယ်ရေးဥပဒေတွေနဲ့အညီ သက်ဆိုင်ရာ မြို့နယ်တရားရုံးတွေမှာ တရားစွဲဆိုပြီး အရေးယူ ပြစ်ဒဏ်ချမှတ်ထားတဲ့ ဖြစ်စဉ်တွေရှိတယ်လို့ ဆိုပါတယ်။ USDT နဲ့ နိုင်ငံခြားငွေ ဈေးနှုန်းတွေ မတည်မငြိမ်ဖြစ်စေဖို့ Facebook Page ၊ Facebook Group ၊ Viber Group နဲ့ Application (ဥပမာ-Myanmar Market Price) တွေကနေ လှုံ့ဆော်တာတွေကို မြန်မာနိုင်ငံတော် ဗဟိုဘဏ်က စောင့်ကြည့်နေပြီး ဆောင်ရွက်နေတဲ့ လူပုဂ္ဂိုလ်တွေနဲ့ ဆက်စပ်နေတဲ့ လူပုဂ္ဂိုလ်တွေရဲ့ Pay Account နဲ့ Banking Account တွေကို ပိတ်သိမ်းတာ၊ ဖုန်း SIM Card တွေကို ပိတ်သိမ်းတာ၊ တည်ဆဲဥပဒေတွေနဲ့အညီ တရားစွဲဆို အရေးယူတာတွေ ဆောင်ရွက်နေတယ်လို့ သိရပါတယ်။
ဒါ့အပြင် ဗဟိုဘဏ်က နိုင်ငံခြားငွေလဲလှယ်နှုန်း တည်ငြိမ်စေဖို့နဲ့ ဈေးကစားတာတွေ မရှိစေဖို့အတွက် သွင်းကုန် လုပ်ငန်းရှင်တွေ လိုအပ်တဲ့ နိုင်ငံခြားငွေတွေကို Online Trading Platform ကတစ်ဆင့် ရောင်းချပေးတာ၊ နိုင်ငံ ခြားမှာ သွားရောက်ဆေးကုတာ၊ ပညာသင်သွားတာ၊ ဘုရားဖူးသွားတာ၊ အလုပ်အကိုင်ကိစ္စရပ်တွေနဲ့ ထွက်ခွာတာ တွေအတွက် အသေးသုံး နိုင်ငံခြားငွေတွေကို ပုဂ္ဂလိကဘဏ်တွေရဲ့ ငွေလွှဲကောင်တာတွေမှာ ရောင်းချပေးနေ တယ်လို့လည်း ထုတ်ပြန်ထားပါတယ်။
