ဘဏ်တွေက မြန်မာကျပ်ငွေ ဗဟိုဘဏ်ရှိ စာရင်းရှင်အပ်ငွေဖြစ်တဲ့ (CAB)နဲ့ ထားရှိရမယ့် အနည်းဆုံး သီးသန့် ငွေလိုအပ်ချက်ထက် ကျော်လွန်တဲ့ ပျမ်းမျှပိုလျှံသီးသန့်ငွေအပေါ်မှာပေးတဲ့ အတိုးနှုန်းကို ၆ ရာခိုင်နှုန်းထိ တိုးမြှင့် သတ်မှတ် လိုက်တယ်လို့ မြန်မာနိုင်ငံတော် ဗဟိုဘဏ်က မတ်လ ၂၁ ရက်မှာ ထုတ်ပြန်ပါတယ်။ဘဏ်တွေက မြန်မာကျပ်ငွေနဲ့ ထားရှိရမယ့် အနည်းဆုံး သီးသန့်ငွေလိုအပ်ချက်ထက် ကျော်လွန်တဲ့ ပျမ်းမျှပိုလျှံ သီးသန့်ငွေအပေါ်ပေးတဲ့ အတိုးနှုန်းကို မူလက ၃ ဒသမ ၈ ရာခိုင်နှုန်း သတ်မှတ်ထားရာကနေ အခုအခါ ၆ ရာခိုင်နှုန်းအထိ တိုးမြှင့်သတ်မှတ်ခဲ့တာပါ။
ပျမ်းမျှပိုလျှံ သီးသန့်ငွေအပေါ် အတိုးပေးရာမှာ ပျမ်းမျှပိုလျှံသီးသန့်ငွေ ပမာဏ အနည်းဆုံး ကျပ် ၇ ဘီလီယံနဲ့ အထက်ရှိတဲ့ ဘဏ်တွေကိုသာ အတိုးပေးမှာဖြစ်ပြီး အများဆုံး ပိုလျှံသီးသန့်ငွေ ပမာဏ ကျပ်ဘီလီယံ ၅၀ အထိ သာ ခွင့်ပြုမှာ ဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။မြန်မာနိုင်ငံဗဟိုဘဏ်အနေနဲ့ အတိုးပေးမယ့် အနည်းဆုံးနဲ့ အများဆုံး ပိုလျှံသီးသန့်ငွေပမာဏ ဘောင်သတ်မှတ် ချက်နဲ့ ပျမ်းမျှပိုလျှံ သီးသန့်ငွေအပေါ် ပေးမယ့် အတိုးနှုန်းကို အခါအားလျော်စွာ သုံးသပ်ပြီး ဈေးကွက်လိုအပ် ချက်နဲ့ ကိုက်ညီစေဖို့ ပြောင်းလဲပြင်ဆင်တာ၊တိုးတာနဲ့ လျှော့တာတွေကို ပြုလုပ်ဆောင်ရွက်သွားမှာ ဖြစ်ပါတယ်။
အတိုးငွေကို တွက်ချက်ရာမှာလည်း အနည်းဆုံး သီးသန့်ငွေလိုအပ်ချက် ထိန်းသိမ်းမှုကာလအလိုက် နောက်ဆုံးနေ့ ရှိ ပျမ်းမျှပိုလျှံသီးသန့်ငွေအပေါ်မှာ တွက်ချက်မှာဖြစ်ပြီး ထိန်းသိမ်းမှုကာလ နောက်ဆုံးနေ့ရက်ရဲ့ T+2 နဲ့ မြန်မာ နိုင်ငံတော် ဗဟိုဘဏ်ရှိ သက်ဆိုင်ရာဘဏ်ရဲ့ စာရင်းကို အလိုအလျောက် ထည့်သွင်းပေးမှာ ဖြစ်ပါတယ်။ပျမ်းမျှပိုလျှံသီးသန့်ငွေအပေါ် အတိုးပေးတာကို လာမယ့် မတ်လ ၂၆ ရက်ကနေ ဧပြီ ၂၂ ရက်အတွင်း ထိန်းသိမ်းမှု ကာလကနေ စတင်ကျင့်သုံးသွားမှာ ဖြစ်တယ်လို့ ဆိုပါတယ်။ ဒါ့အပြင် ပျမ်းမျှပိုလျှံသီးသန့်ငွေအပေါ်မှာ အတိုးပေး တာကို မြန်မာကျပ်ငွေနဲ့ လက်လီဘဏ်လုပ်ငန်းဝန်ဆောင်မှုတွေ(Retail Banking) ခွင့်ပြုထားတဲ့ နိုင်ငံပိုင် ဘဏ်တွေ၊ ပုဂ္ဂလိကဘဏ်တွေနဲ့ နိုင်ငံခြားဘဏ် လက်အောက်ခံဘဏ်တွေက တစ်ပြေးညီ ဆောင်ရွက်သွားမှာ ဖြစ်တယ်လို့ ထုတ်ပြန်ထားပါတယ်။
