စည်းကြပ်မှုက ကင်းလွတ်နေတဲ့ ဝင်ငွေတွေအပေါ် ကောက်ခံတဲ့ အခွန်နှုန်းထားကို ပြီးခဲ့တဲ့နှစ်ကအတိုင်း မပြောင်း လဲဘဲ သတ်မှတ်ထားတယ်လို့ ၂၀၂၅ ခုနှစ် ပြည်ထောင်စုရဲ့ အခွန်အကောက်ဥပဒေအရ သိရပါတယ်။
အခုလ ဧပြီ ၁ ရက်မှာ စတင်အသက်ဝင်တဲ့ ၂၀၂၅ ခုနှစ် ပြည်ထောင်စုရဲ့ အခွန်အကောက်ဥပဒေမှာ ၂၀၂၄ ခုနှစ် အတိုင်း စည်းကြပ်မှုက ကင်းလွတ်နေတဲ့ ဝင်ငွေတွေအပေါ် ဝင်ငွေအလိုက် အခွန်နှုန်းထား ၃ ရာခိုင်နှုန်းကနေ ၃၀ ရာခိုင်နှုန်း သတ်မှတ်ထားတာပါ။ ဒါ့ကြောင့် အခု ၂၀၂၅ ခုနှစ်အတွက် အခွန်နှုန်းထားအနေနဲ့ ဝင်ငွေ ၁ ကျပ်ကနေ ကျပ်သိန်း ၃၀၀၀ အထိကို ဝင်ငွေခွန်နှုန်း ၃ ရာခိုင်နှုန်းသာ ဆက်လက်ပေးဆောင်ရမှာ ဖြစ်ပါတယ်။
ကျပ်သိန်း ၃၀၀၀ ကနေ သိန်း ၆၀၀၀ အထိကိုတော့ ၅ ရာခိုင်နှုန်း၊ သိန်း ၆၀၀၀ ကနေ သိန်း ၁၀,၀၀၀ အထိကို ၁၀ ရာခိုင်နှုန်း၊ ကျပ်သိန်း ၁၀၀၀၀ ကနေ ၃၀,၀၀၀ အထိကို ၁၅ ရာခိုင်နှုန်းနဲ့ ကျပ်သိန်း ၃၀,၀၀၀ အထက်ကို ၃၀ ရာခိုင်နှုန်း အခွန်ပေးဆောင်ရမှာ ဖြစ်ပါတယ်။အိမ်ခြံမြေအဆောက်အဦ၊ မော်တော်ယာဉ်လို အခြေပစ္စည်းတစ်ရပ်ရပ်ကို ဝယ်ယူရင် ဝင်ငွေရလမ်း မတင်ပြနိုင်တဲ့ ငွေကို စည်းကြပ်မှုက ကင်းလွတ်နေတဲ့ဝင်ငွေလို့ သတ်မှတ်ပြီး ဒီပမာဏအတိုင်း အခွန်ပေးဆောင်ရမှာ ဖြစ်တယ် လို့ သိရပါတယ်။
