လာမယ့် ဆယ်စုနှစ်အတွင်း မြန်မာ့အထည်ချုပ်လုပ်ငန်းဟာ အမေရိကန်ဒေါ်လာ ၁၅ ဘီလီယံတန်တဲ့ လုပ်ငန်း အဖြစ် ကြီးထွားလာဖို့ လျာထားတယ်လို့ မြန်မာနိုင်ငံ အထည်ချုပ်လုပ်ငန်းရှင်များအသင်း(MGMA)ရဲ့ ၁၀ နှစ်တာ မဟာဗျူဟာအစီအစဉ်(၂၀၂၅-၂၀၃၄)မှာ ဖော်ပြထားချက်အရ သိရပါတယ်။
ဆယ်စုနှစ်အတွင်း လုပ်သားအင်အား ၁ ဒသမ ၂ သန်းကနေ ၁ ဒသမ ၆ သန်းအထိ ခန့်ထားနိုင်ဖို့ လျာထား ထားပါ တယ်။ ၂၀၂၅ ခုနှစ်မှာတော့ အမေရိကန်ဒေါ်လာ ၅ ဘီလီယံခန့် တန်ကြေးရှိတဲ့ လုပ်ငန်းတစ်ခုအဖြစ် ရပ်တည်နေ ပြီး လာမယ့် ဆယ်စုနှစ်အတွင်း မြန်မာ့အထည်ချုပ်လုပ်ငန်းကဏ္ဍမှာ နိုင်ငံခြားရင်းနှီးမြှုပ်နှံမှု အများအပြား ဝင်ရောက်လာဖို့အတွက် ဖိတ်ခေါ်သွားမယ်လို့ ဆိုထားပါတယ်။အထည်ချုပ် လုပ်ငန်းကနေ တန်ဖိုးမြှင့်ထုတ်ကုန်တွေ ထုတ်လုပ်ပြီး ဝင်ငွေရရှိမှုမြင့်တက်အောင် ဆောင်ရွက် သွားမှာဖြစ်သလို ကမ္ဘာ့ဈေးကွက် အများအပြား ထပ်မံရရှိအောင်လည်း ဆောင်ရွက်သွားဖို့ ရှိနေပါတယ်။
လက်ရှိမှာ အထည်ချုပ်လုပ်သားတွေကို သင်တန်းပေးနေပြီး လာမယ့် ဆယ်စုနှစ်အတွင်း လုပ်သား ၄ သိန်းနီးပါး ကို သင်တန်းတွေ ပို့ချပေးသွားမယ်လို့ သိရပါတယ်။မြန်မာ့အထည်ချုပ် ကဏ္ဍအနေနဲ့ စိန်ခေါ်မှုတွေ ရှိနေသေးပြီး ဒီစိန်ခေါ်မှု ပြဿနာတွေဟာ မြန်မာ့ အထည်ချုပ် ကဏ္ဍ ဖွံ့ဖြိုးတိုးတက်မှုအတွက် သိသာထင်ရှားတဲ့ အဟန့်အတားတွေ ဖြစ်တယ်လို့(MGMA)ရဲ့ ၁၀ နှစ်တာ မဟာဗျူဟာ အစီအစဉ် (၂၀၂၅-၂၀၃၄) မှာ ဖော်ပြထားပါတယ်။ပြည်တွင်းအထည်ချုပ်ကဏ္ဍမှာ တရုတ်နိုင်ငံက ဝင်ရောက်ရင်းနှီးမြှုပ်နှံတဲ့ စက်ရုံက ၆၀ ရာခိုင်နှုန်းလောက်ရှိပြီး တရုတ်နိုင်ငံ ပြီးရင် ကိုရီးယားနဲ့ ဂျပန်နိုင်ငံတွေက ဒုတိယအများဆုံး ဖြစ်ပါတယ်။
