ရန်ကုန်(အကယ်ဒမီ) ရွှေသန့်စင်ခန်းက စံချိန်မီရွှေတစ်ကျပ်သားကို အလေးချိန် ၁၆ ဒသမ ၃၂၉၂ ဂရမ်နဲ့ ဒီဇိုင်း အသစ်ကို ဖေဖော်ဝါရီ ၁၂ ရက်က စတင်ထုတ်လုပ်ခဲ့တယ်လို့ ရန်ကုန်တိုင်းဒေသကြီး ရွှေလုပ်ငန်းရှင်များအသင်းက သိရပါတယ်။ ၁၉၆၇ ခုနှစ်ကတည်းက ရွှေတစ်ကျပ်သားရဲ့အလေးချိန်စံနှုန်းကို ၁၆ ဒသမ ၃၂၉၃ ဂရမ်နဲ့ တွက်ချက် ရောင်းချဖို့ သတ်မှတ်ထားပေမယ့် ဈေးကွက်ထဲမှာ ရွှေတစ်ကျပ်သားအလေးချိန်ကို ၁၆ ဒသမ ၆၀၆ ဂရမ်နဲ့သာ တွက်ချက်ရောင်းချနေကြတာပါ။
အခုအခါမှာတော့ ဓာတ်သတ္တု(ရွှေ) ဈေးနှုန်းသတ်မှတ်ရေးကော်မတီက ၁ ကျပ်သားကို အလေးချိန် ၁၆ ဒသမ ၃၂၉၃ ဂရမ်နဲ့သာ ဈေးကွက်အတွင်း တစ်ပြေးညီတွက်ချက်ဖို့ ထုတ်ပြန်ထားတဲ့အတွက် အခုလို ရွှေအလေးချိန်ကို ပြင်ဆင်ထုတ်လုပ်လာတာ ဖြစ်ပါတယ်။ဒီအလေးချိန်ဟာ ကမ္ဘာ့ရွှေအလေးချိန်နဲ့ တူညီသွားပြီဖြစ်လို့ မြန်မာ့ရွှေကို နိုင်ငံတကာမှာလည်း အရောင်းအဝယ် လုပ်လို့ ရသွားမှာဖြစ်တယ်လို့ ရန်ကုန်တိုင်းဒေသကြီး ရွှေလုပ်ငန်းရှင်များအသင်းဥက္ကဋ္ဌ ဦးမျိုးမြင့်က အသင်းရဲ့လူမှု ကွန်ရက်စာမျက်နှာကတစ်ဆင့် ဖြေကြားထားပါတယ်။
မြန်မာ့ရွှေကို အမေရိကန်၊ အင်္ဂလန်နဲ့ ဂျပန် အပါအဝင် ပြည်ပဈေးကွက်ဝင်နိုင်ဖို့အတွက် ရွှေအရည်အသွေး စံချိန် စံညွှန်းဓာတ်ခွဲခန်းကို ရန်ကုန်တိုင်းဒေသကြီး ရွှေလုပ်ငန်းရှင်များအသင်းရုံးမှာ တည်ထောင်မယ်လို့ သိရပါတယ်။ဖေဖော်ဝါရီ ၁၄ ရက်မှာ ဓာတ်သတ္တု(ရွှေ) ဈေးနှုန်းသတ်မှတ်ရေးကော်မတီက ထုတ်ပြန်တဲ့ ရွှေရည်ညွှန်းဈေးဟာ တစ်ကျပ်သားကို ကျပ် ငါးဆယ့် လေးသိန်း ကိုးသောင်း ဖြစ်ပါတယ်။
